O le umi o tālia se taunuuga o moliaga o le aafia i ni faiga piopio i se tulaga aloaia poo le official corruption faasaga i le susuga Uelese Lolo sa avea ma se tasi o taitai leoleo i le falepuipui i Tafaigata, o lea ua taunuu suesuega a le faamasinoga i le faamaonia o moliaga ma faasala ai loa i le falepuipui mo le umi e tolu tausaga ma le ono masina.
Na ioe Uelese i le moliaga e tasi o lona talia o se tupe e $50 tala mai se pagota ma se tamai fana poo se hand gun. O le tamaitai faamasino o le Faamasinoga Faaitumalo le afioga Mata Tuatagaloa na ia suesueina le mataupu ma aumai ai lana iuga i le Aso Faraile ua mavae.
Faaalia manino e le tamaitai faamasino o le faia e lē ua molia o le solitulafono o se ata manino lea o le aafia o Uelese o se alii leoleo i faiga faaalatua a o galue ai o se leoleo o le falepuipui.
O lana gaioiga ua tuu maualalo ma faamāmāsagia ai le tulaga o le galuega faaleoleo e pei ona saunoa le tamaitai faamasino. Na talia e lē ua molia ma faasalaina, le lima sefulu tala mai se pagota, ae ia faia ai se faaiuga e tatala le avanoa i le pagota e alu ai e asi lona aiga i se aso e tasi. Na manaomia foi e Uelese se aupega poo le fana mai le pagota e ui sa ia silafia lelei e lē faatagaina i Samoa lea ituaiga o laau malosi.
I le talosaga a le tamaitai loia o Diana Peters Roma sa tulai mo Uelese sa ia valuvalusia ai aa o le fau mo se finagalo alofa o le faamasinoga ma ia silasila i itu lelei o le salamō moni o lē ua molia, ona sa ia faia le solitulafono ma lona manatu o se aga masani lea i le faasamoa o le faia o se mea lelei mo se isi pe a fai atu ia te ia se mea lelei. O le folasaga a le loia o le mafuaaga lea na talia ai e Uelese le tupe mai le pagota.
E tusa ai ma tolaulauga a le loia na faaalia ai ua 32 tausaga o galue Uelese i le Matagaluega o leoleo ma falepuipui, ma ua ia talia le lē tonu ma le lē sa‘o o lana gaioiga na fai. Peitai i le faaiuga a le faamasinoga na faaalia ai e le tamaitai faamasino o Mata Tuatagaloa, o le taimi sa tupu ai le solitulafono o loo umia e lē ua molia se tulaga maualuga o le taitai leoleo poo se police inspector, aemaise sa faia lana tautoga e faatino ai ana galuega ma tiute ma le faamaoni ae lē o le tulaga lea na tulai mai.
O Uelese Lolo sa filifilia i se tasi o aumalaga o le vasega o leoleo mai Samoa sa galulue mo tiute o le tausia o le filemu i lalo o Malo Aufaatasi i atunuu mamao.
A o lei galue i le matagaluega o leoleo sa muai tautua o ia i le auaunaga a le ofisa o le tinei mu, lea na faaauau ai pea ina ua see ane lea auaunaga a le Malo ua faatasia ma le Matagaluega o leoleo ma falepuipui i nai tausaga ua mavae.
