O le feagai ai o Niu Sila ma le taligamalo o le Ipu o le Lalolagi i le Lakapi, ua taumafai ai lava le malo ina ia maua uma e atumotu tuaoi o le Pasefika le avanoa e fesootai ai ma lea taligamalo tele.
O le vaiaso lenei ua tufa ai tusiata ma tusi faitau, ua foai e le Hai-Komesina o Niu Sila i Samoa o Nick Hurley mo aoga tulagalua uma o Samoa.
O le faanaunautaiga e pei ona ta‘ua e le sui aloaia o le Malo o Niu Sila i Samoa nei, ina ia maua e le fanau aoga i aoga laiti le malamalama i lenei Taamilosaga tele ua talimalo ai Niu Sila.
O ā lava galuega ua faatino auā le Taamilosaga lenei, ua maua uma lava i ata ma faamatalaga ua lomia i nei tusi faitau. Ua iai aai o Niu Sila o loo faatino ai taaloga, ua iai ‘au o loo auai mai i soo se atunuu o le lalolagi, ua iai foi ma ata ma suafa o tama ta‘uta‘ua o le lakapi.
O le taimi foi lenei ua amata le taamilosaga, na faaalia e Nick Hurley ua talafeagai lelei ma nei tusi ua tufatufa atu auā e mafai ai e le fanau ona matamata i le lakapi ma iloa poo ai lea e taaalo a o ai le atunuu o loo faapea ona taaalo ai.
E ese foi aga a Niu Sila latou e saga faalauiloa atu ai le atunuu i ona tuaoi i le Pasefika ma isi atunuu o le lalolagi. E tolu ituaiga tusi eseese ma ua vaevae lelei lava mo fanau mai i le vasega muamua seia oo lava i le vasega faaiu, le Tausaga Valu.
O le Sui Palemia, le Afioga Faumuina Tiatia Liuga, na saunoa e talia lenei meaalofa mo le fanau a le atunuu, lea o le a mautinoa e pei ona ta‘ua e le afioga ia Faumui, o le a tele se taimi o le fanau e faaalu ai auā e fiafia tele tamaiti Samoa i lenei taaloga.
Na togi mai ai foi ma matematega a le Afioga Faumui aemaise o le faamalosiau i tama o le Manu Samoa, o lea o le a iloilo lelei lava le tulaga e iai le tausinioga a le ‘au a le atunuu ma e mautinoa lava le faaopoopo o se fesoasoani tau tupe mo tama, e pei ona ia ta‘ua pe afai e oo atu le taumafaiga i le Quarter-Finals aemaise ai isi laasaga i luga atu.
E pei lava ona vaaia i le lua vaiaso talu ai faasolo mai ai i le vaiaso lea faato‘ā tuanai atu o le toatele o fanau laiti i aoga nei i le atunuu, e iloa uma suafa o le Manu Samoa ma o se faailoga o le toatele o fanau e mulimuli i le lakapi.
O se tamaitai o le Aoga a le Samoa Primary lea na tulai ma saunoa faafetai e fai ai ia ma sui o tamaiti ma teineiti aoga uma o Samoa i lenei foi meaalofa ua tauaao atu i fanau i lenei taimi o le tausaga.
