Tofotofoga o le alofa moni

Ina ua taunuu le pasi na agai atu ai le alii o Iosia Pasitale i le nofoaga sa tuutala ma le tamaitai o Korina la te feiloai ai, na vave ona oso ifo i lalo Iosia, ua tu ma faamafolafola lelei lana togiga o le fitafita a lona atunuu o loo ia ofuina, ma tau autilotilo atu i le tumutumu o tagata ia o loo lolofi mai, aua ua oo foi i taimi pisi ua manava galuega o le aso, ua amata ona faatopetope uma mai tagata e tau saili o latou auala i aiga. Na pau lava le mea o loo laualuga i le mafaufau o Iosia, o lona fia vaai atu i se tamaitai o loo faapipii mai sana fuarosa mumu i lona ofu, ona ia mautinoa loa lea, o lana Korina lava lea ua leva ona moemiti i le fia vaai i ai.
O le sefulutolu ai lea o masina talu ona fofoa ae lenei masaniga, ma e faatauvaa lava lona amataga mai, ae ua avea o se mafutaga ua matua lauolaola ai lagona o le alofa faamaoni o le tasi i se isi, e ui lava o lea ua fofoa le alofa i luga o upu, ae lei vaai lava le tasi i le isi. O Iosia o se alii e galue o se leoleo i lona atunuu. Ma o lenei masaniga na amata i le aso sa avea i se aso malolo o Iosia, ma na agai atu i le faletusi e tasi i lo latou aai, e fia maua sana tusi manaia e faitau. Na piki e Iosia se tusi e faatatau i talaaga o talaga na uluai folau ma nofoia lo latou atunuu, peitai a o faasolo lana faitau, na ia tau atu ai i se tasi o laupepa lea na tosina i ai lana vaai, ona e lē o se vaega o tusitusiga a le tusi, ae o loo sulu ai e se tasi se fasi pepa ma se faaupuga e faapea, ‘a e fia maua se faauoga mafana ma le faamaoni, ou te fiafia e talisapaia se upu mai ia te oe.’
I lalo ifo o nei upu o loo tusi ai le tuatusi ma le igoa o le tagata e ana upu valaaulia i luga, o Korina Siakisone. Na matua tosina lava Iosia i le aulelei o le tusitusi a le tagata lenei, ma na faaata e Iosia i le tau lava o lana pupula atu i le tusitusi ma upu o loo tusia ai, se tamaitai lalelei ma foliga agavaivai ma le tausaafia, ona amata ai lava lea ona avaga lona mafaufau i lenei tagata ma ia sei ese loa le fasi pepa ma tuu i totonu o lana taga.
Na faafesootai e Iosia le tamaitai o Korina, ma sa ia maua lelei ma amata loa ona la fetusiai. O se mafutaga ua matagofie lava lona aluga; e tele ina la fiafia e talatalanoa i le tele o mea mananaia e ausia e tagata eseese i le lalolagi i o latou tomai faalemafaufau, ma na iloa ai foi e Iosia, e toetoe lava e tutusa le tele o mea e la te fiafia faatasi i ai. O Korina o se tamaitai e fiafia e faaaoga nisi o mea faifaaili, e pei o le taina o le kitara ma le piano, ma o mea foi ia e fiafia i ai le alii o Iosia. Sa faagasolo le la mafutaga ma na iai le isi taimi na fesili ai Iosia ia Korina mo sona ata e lafo ane mo ia, peitai na lei talia e Korina lena manao. O le mafaufau o le teine, afai e moni le alofa o Iosia mo ia, e le tau manaomia la se ata, ina nei ala ona tosina ona o foliga ae le o se alofa moni. O taimi uma lava e taunuu ai le tusi a le tasi i le isi, o le faasolosolo pea lea ona tuputupu ae pea le fatu o le alofa, ma ua faia foi se tonu, i se taimi ua le o toe mamao, ona la feiloai loa lea sei fevaaiai ma iloa tonu e le tasi le isi.
Peitai, na faafuasei ona valaauina Iosia ma isi leoleo e toa sefuluiva ina ia auai atu i se vaega o le a agai atu i le atunuu o Timoa i Sasae, ina ia fesoasoani i le leoleoina o le filemu o lena atunuu mai vevesi o loo tulai mai ai. Sa mamafa i le mafaufau o Iosia lona fia vaai tele ia Korina, peitai ua leai lava se mea e mafai ona o le aso lava na oo ane ai le faatonuga a le komesina o leoleo, na faatulaga ai foi o le taeao e sosoo ai e tatau ai ona tuua le vaega lenei a leoleo le atunuu ma agai atu loa mo le latou auaunaga i Timoa i Sasae.
E ui i se faanoanoa o Iosia ua le taulau le la fuafuaga na fai ma si ana manamea, ae ina ua ia vili ma talanoa atu ia Korina, sa malamalama si tamaitai ma ia faamalosiau mai ia Iosia, ina ia talia lona tofiga ma agai mo le galuega, ae o le a faatali atu mo lona toe taliu mai. Na alu Iosia i lona valaaulia i Timoa i Sasae, ma sa punou ma le faamaoni i lana galuega, ae o lona loto atoa ma lona tino o loo afifi malu i autafa o Korina i ona lagona. Sa avea foi lea o se faamalosiau i aso taitasi, ina ia tauivi ma ia mataala i taimi uma, ina ia toe foi ane ma le saogalemu i lona atunuu, aemaise ia aulia le aso ua tuupoina e la te feiloai ai pe a toe taliu i fanua le malaga a le fitafita a leoleo.
Ua toa le taua i totonu o Timoa i Sasae, ma ua toe amata ona foi ane le olaga saogalemu i totonu o le atunuu, ona logoina loa lea o le vaega o fitafita lea sa auai atu ai ma Iosia, ua tatau nei ona toe taliu i lo latou atunuu. O le aso lava lea na auina mai ai e Iosia se feau faauaealesi ia Korina, e logo mai i ai, pe mafai ona ia faatali atu mo ia i le vaea e faatai ai pasi a le atunuu, lea e fesootai ai pasi mai le itu i sisifo o le atunuu, ma pasi mai le itu i sasae. Maeu le fiafia o le tamaitai o le a oo ona la feiloai ma le alii leoleo ua leva ona faavalea i ai lona mafaufau.
Talu ai o lea e lei fevaaiai lava le toalua lenei, sa tau mai ai e Korina ia Iosia, o le a ia faamauina lana pina o se fuarosa mumu, i lona ofu i lena aso, ina ia faigofie mo Iosia ona iloa ai o ia. E lei tu lelei le pasi ae ua tu i luga le alii fitafita, ua faamafolafola lelei ona lavalava, ua sii ifo i lalo lana ato mai le fata sa teu ai i luga ae o lona nofoa, ma laa atu loa i fafo, sei autilo lana manamea pe faigofie ona ia iloa atu i le lalolagi o tagata aemaise foi le toatele o tamaitai ia ua tau fai lolofi mai i autafa o le pasi lea o loo o atu ai le toatele o alii leoleo ia na malaga faatasi ma Iosia i Timoa i Sasae.
Na tau autilo atu pea Iosia ma taumafai e faaata i lona mafaufau foliga o lana manamea, ma e lei umi ae ona vaaia loa se tamaitai lalelei, e faasasao lona fuaitino, e le matua lapoa pe paee tele foi, ae o se fuaitino o se tamaitai ua matua fetaui lelei ma moomooga o soo se tamatane. O loo ia laei maia se suti lanu samasama vaivai, ma o ana teuga e atagia mai ai se tagata e le gata ina atamai i soo se vaega o lona olaga i lona mafaufau ma ana teuga, ae e ono faailoa mai ai foi e tulelei lona tupuaga. Ma pe a faatusatusa e Iosia foliga nei o le tamaitai ua taulai tonu atu i ai lana vaai, ma upu ia e masani ona la talanoa ai ia la tusitusiga, ua matua tonu ma ioe lona mafaufau, o Korina lava lea e savali sao mai i le itu o loo tu atu ai.
Ae paga lea, e tasi lava le mea o loo misi i le vaai atu a Iosia, e le o iai se pine o se fuarosa mumu i le ofu o le tamaitai lalelei o loo agai mai. Peitai i tua atu o lenei tamaitai, na toe iloa atu ai e Iosia, se isi tamaitai, ma i lana vaai ua foliga ua agai atu i le 50 ni ona tausaga, ma e moni lava o loo laei mama mai, ae leai ni ona foliga lalelei e ono tosina gofie i ai se alii, e le pei o le tamaitai o loo muamua mai luma. Na latalata mai le tamaitai lalelei ma ua oo tonu mai luma o Iosia, ona faatalofa mai lea e ala i le geno o ona mata ma liai laititi i luga lona ulu, ma faaauau pea ona savali ma pasia si alii fitafita o loo tu faamalo pea, ma taumafai e talia i lona mafaufau, e foliga o Korina le fafine faamatua tagata lea o le a sosoo mai nei ona la feiloai.
Ua lagona e le tama ua tatavale lona fatu, e peisei ua le tau lau o ona moomooga ua leva ona fatufatu mai, peitai i le taimi e tasi ua toe faasolo uma ane i lea taimi puupuu i lona mafaufau upu ma lagona sa faaali atu e Korina i ana tusi uma ia te ia, o ni upu sa matua avea ma maluapapa ia Iosia i soo se taimi e tau vaivai ai ona lagona, ma o le ala foi lea sa faananau ai lona loto ina ia oo mai le aso o le a la faatasia ai ma lenei tamaitai, ona e maeu le tamalii ma le loloto o ona lagona i taimi uma e la te talanoa ma faufautua mai ai ia te ia. O le toe tau o le mafaufau o Iosia i nei agavaa o Korina, na ia faapea ifo ai, o le a ou le amanaia poo a lava ona foliga, ae faafetai i le Atua o lea ua ou vaai atu i lau manamea ua leva ona ou fia feiloai atu i ai.
Ua oo tonu mai nei le tamaitai matua i luma o Iosia, ma ua manino atu nei i le vaai a le tama le fuarosa lanu mumu, ona faaloloa atu loa lea o lona lima e faatalofa atu i le tamaitai ma faapea atu, ‘Faamolemole, poo Korina oe? O au o Iosia.’ Ua faatautu nei le fafine ma faataupupula mai i le tama lea ua soso atu e faalatalata atu, ma aapa atu e opo mai lana manamea, ae na aapa mai le fafine ma peiseai e taofi mai le tama ma faapea mai, ‘E le o au o Korina, ae o le fuarosa lenei na faapipii mai e le tamaitai lea ua faatoa pasi atu ma oe, sa ia tuu mai e faamau i lou ofu. Ae o lau Korina moni lena na e muai faataupupula i ai.’ Na toetoe pe le fatu o Iosia i le tei tele, ma ia toe liliu atu loa i le tamaitai lea na pasia o ia, ae o loo tu mai le isi pito o le fale faatalipasi, ma ataata mai i le tama. Na faafetai Iosia i si fafine matua, ona liliu loa lea ma momoe fiafia atu, a o tu Korina ma faaloloa mai i ai ona lima, e faatali mai le oo atu a lana manamea.
O se feiloaiga fiafia i loimata ua molimauina e le anoano o tagata o loo tutu solo e faatali a latou pasi i lea aso, a o fusi mau e Iosia lana manamea ma musumusu atu i lona taliga, ‘faafetai i le Atua ua ia foai mai le penina sili ona taugata mo au.’