Sa suia le faamoemoe o le tina i se vaitaimi lata mai a o galue pea i lana galuega faapolofesa o le tausimai. E pei ona sa ta‘ua muamua, sa iai le manaoga o le tina mai lava i lona laitiiti, e fia galue o se faiaoga, peitai sa usitai pea i le faatonuga a ona mātua. O le mafuaaga lea sa manatu ai Tofilau, o le a se‘i alu pea e taumafai ma tofo i le faiaoga, ona o lana lea miti sa soifua a‘e lava ma ia.
O lea sa toe ulufale ai i le ACE e pei ona sa faaigoa ai i lena vaitaimi, ae ua suia nei i le AUT. E lua tausaga sa aoaoina ai le pepa mo le faiaoga i aoga amata, poo aoga faataitai. O lea vaitaimi sa leai se vaega Pasefika e pei ona iai nei, sa na o le tasi lava le puna o lea foi aoaoga (mainstream). E iai foi ona tulaga faigata, ona e fai lava si lavelave o feuiaiga, ae faafetai lava i le Atua, sa fesoasoani mai ma sa faataunuu manuia ai le faamoemoe ma maua ai le tusipasi o se faiaoga mo aoga a tamaiti.
O le vaega mulimuli o le soifua aoaoina o Tofilau, o le agai lea ina ia lesitalaina lona faiaoga, ma toe aoaoina foi isi vaega sa manaomia tele e le Matagaluega o Aoga, ina ia fesootai ma faiga faavae e avea ai o se tagata ua talafeagai mo le amataina pe faatu se aoga amata. Peitai e ui ina ua mae‘a foi ma taunuu lea faamoemoe, ae sa ta‘ua e le tina e oo mai lava i le taimi nei, o loo aoaoina pea i le tele o auala ma metotia e fesoasoani ai mo le fanau i totonu o le aoga, o loo ua avea ma ona mitamitaga.
O le vaiaso fou o le toe sosoo atu ai ma faamae‘a le itulau mo Tofilau Punipuao Malelega, i lona soifua galue atoa ai ma isi vaega matagofie o lona soifuaga e pei ona sa faamatalaina.
