Soifua aoaoina
Sa aoaoina lava mai aoga maualalo i Safune i Savaii, ona sosoo ai ma le aoga a le latou itumalo i Savaii lava. I totonu lava o lona soifua taumafai, sa ia sueina ai ni suega tāua e filifili ai poo fea tonu e agai i ai lona sā i le faaauauina o aoaoga, poo le agai loa e saili se galuega e tua i ai le aiga talu ai le mativa ma le lē tagolima i lena vaitaimi.
E iai nisi o filifiliga sa ia vaai i ai ina ua faamanuiaina uma suega ulufale sa ia taumafai i ai. O le aoga faafaiaoga, o le aoga faafomai, ma nisi o filifiliga. Sa ta‘ua e le tina, e ui ina sa iai lona naunautaiga e fia faiaoga, peitai sa usitai ma mulimulitai i le manaoga o ona mātua, sa faatonuina ai ina ia alu e aoga faafomai, ma le faamoemoe ia avea o se teine tausimai, ia poo le fomai foi e pei ona masani ai le gagana i lo tatou atunuu, auā sa tatou faaaogaina le upu fomai, e ta aofai ai nurses ma doctors.
Sa aoaoina lava i le aoga faatausimai i Motootua ma faamanuiaina ai, ona faapitoa loa lea o se tamaitai tausimai pasi i le fale tipitipi i Motootua lava.
Sa faaauau le soi fua aoaoina o Tofilau ina ua taunuu i Niu Sila i le tausaga e —–, ina ua taumafai atu mo se galuega, peitai sa le amanaia tele e Niu Sila, agavaa sa malaga mai ma tagata Samoa, pei lava foi o faiaoga latou. Sa saili galuega i le falemai tele i Ueligitone, ina faatoa taunuu i Niu Sila, ae mulimuliane sa le taliaina e pei ona taua.
O le mafuaaga lea sa toe taumafai ai loa mo se isi aoaoga, e ui lava foi ina vaivai le gagana i lena vaitaimi, pei ona saunoa iai le tina, ae sa tuu pea i luma le tagavai o le saili malo, mo ia ma le lumanai o tagata o lona atunuu.
Sa toe ulufale i aoaoga faafomai i Ueligitone lava mo le isi tolu tausaga, ma na iu ma le manuia le taumafai. Sa ia taulimaina ai se tusipasi faamaonia o se tamaitai tausimai pasi lesitalaina i totonu o Niu Sila.
E le gata ina faauu o se tamaitai tausimai pasi, ae sa iai le tulaga e faapitoa ai lona silafia, i le tulaga o tipiga ma taotoga o le gasegase o le fatu. O le avea ma tamaitai tipitipi i totonu o le falemai tele i Ueligitone, e lei faigofie auā e tatau ona malamalama lelei i le faiga o taotoga o le fatu. O lea sa toe fautuaina ai e toe onosai mo se isi foi aoaoga, e saga tapue ma faateleina ai le tomai mo le galuega. Sa toe taumafai ai mo le isi foi lua tausaga ma sa iu ma le manuia foi lea toe taumafaiga.
O le a faaaauau pea le tulaga ma le soifua aoaoina o Malelega seia oo mai i le taimi nei, ona tatou toe foi lea i galuega sa galue ai ina ua mae‘a aoaoga sa feagai ma lea tina.
