E fiafia lava e toe faafeiloai atu pea ma faatalofa atu i le mamalu o le aufaitau, aemaise o paaga ma uo a le Samoa Times, ma le tatou itulau o le Samoa Saili Malo. Afai foi o lou taimi muamua lenei ua e faitauina ai le tatou nusipepa ma le itulau lea, e faatalofa faapitoa atu mo oe i lenei vaiaso. Malo le soifua manuia ma le lagi manino, Viia le Alii.
Ua mae‘a atu se tasi o talaaga matagofie ma le tamaoaiga i le tulaga o galuega, aemaise o matatia na ausia i le soifuaga o le afioga ia Leaupepe Taulapapa Fuatino Faimaala Phillips. Ou te lē iloa i sou finagalo ma lau faitau i ai, ae talitonu le agaga, e le gata o se tasi o lu‘itau tele mo le itupa o tamaitai ma tina, a o se ‘ai foi lea mo i latou i le taumafaiga o le atunuu ma tiute o fitoitonu i ai. E toe faafetai atu mo le ofoina mai o faamatalaga ma le taimi, e fai ma sao o le tatou tusitusiga i aai o finagalo o le atunuu mo nei ma ielua.
O le vaiaso nei ua manatu ai o le a se‘i pāpā aveloa pea ma ua manatu o le a lē see ese mai i le faaauauina o le itupa o tina ina ia saga faamaonia ai pea le mau “e au le inailau a tina”. O le afioga ia Tofilau Punipuao Malelega, ua fesoasoani mai i le tatou itulau. E tele foi ni galuega lelei ma le iloga sa ia ausia i lona foi taimi e le gata i totonu o le atunuu i Samoa, ae o loo galue lava foi seia oo mai i le taimi na talanoa ai ma le tatou nusipepa.
O afioaga o le afioga ia Tofilau, o Faletagaloa i Safune, ma Iva i le motu tele i Salafai. Na soifua lava ma tuputupu a‘e o se tamaitai i totonu o Faletagaloa, seia oo ina matua ma agai ane ai i se vaitaimi o lona soifuaga i le aiga o lona tina i Iva. Ona talu ai e iai foi le uiga tāua o le suafa o lenei tina, o lona igoa muamua e pei ona silafia ai e le toatele, aemaise nisi sa latou iai faatasi i a‘oa‘oga ma galuega i le atunuu.
E manaia foi lo tatou faitau i ai, ona o le tasi lea itu lelei o le tatou itulau, o le toe manatua ai ma toe tepa i mafuaaga ma le pogai sa faia ai e o tatou tupuaga se‘i tulou, le tele o mea e iai ni ona sootaga e oo mai lava i lo tatou foi vaitaimi. O le igoa Malelega, a o lona uiga atoa e faapea o le ‘Malelega-a-le-Toelau’. Atonu e mafai ona faamaonia mai e nisi o le afioaga o Iva, ona o le latou nuu lea e faapea e iai le tala na maua ai lea igoa ma faaigoa ai le tina e pei ona outou silasila ma faitau i ai.
