O le tausaga nei 2010, sa tali mai ai talosaga e lua, ma na faamaonia mai ai le vaega tupe mai le malo e tauala ane i le matagaluega o aoga, mo le fausia o se isi nofoaga fou mo le aoga amata a le Puna o le Atamai. E 1.3 miliona tala na faamaonia mai, ma ua amata ai nei le galuega fou i le fausiaina o le faleaoga i Cleek Rd i Magele lava. O le fanua na tuuina ane e le pulega faaitumalo a Manukau, ina ua faamanuia le talosaga a Tofilau Malelega ma lana aoga amata.
Ua iai le faamoemoe o le afioga ia Tofilau ma le pulega o le aoga, o se taimi o le tausaga nei lava, poo le masina o Aukuso o le a tatalaina aloaia ai lenei nofoaga fou. O le a faapea foi ona faaigoaina i le igoa o le tina sa tauasaina, ma finauina lea galuega tele, e faamanatu ai ma faailogaina ai le tautua ma le Saili Malo a lenei tina. O le nofoaga fou o le a faaigoaina o le “Malelega a le Toelau”. O lea nofoaga foi o le a aoaoina ai gagana e lua, o le Samoa ma le Igilisi.
E momoli ai le agaga faafetai o lenei tina i le afioga ia Taito Phillip Field, sa avea ma faipule o le itumalo o Magele, ona o le finau malosi i lona taimi a o tulai mai, na mafua ai ona faamatuu ane le tele o avanoa sa maua e faatino ai le faamoemoe mo le fanau. E lē gata i lea, a o le afioga foi ia Anae Arthur Anae, o se tasi foi o tamalii o le atunuu sa tuu ane lana fesoasoani mo isi vaega sa manaomia mo le faamoemoe lava lea e tasi.
Soifua tautua mo le Atua ma le soifuaga faaleagaga
E taunuu i Niu Sila mo le taimi muamua, e tasi le ekalesia Samoa a le EFKS i Ueligitone, e tasi foi i Aukilani. Sa galulue i Newtown i Ueligitone i lalo o le taitaiga a le susuga i le toeaina ia Puni Leota ma le faletua ia Lagisi. O le susuga ia Risati ma Feleni, na soloai ane mo le galuega ina ua valaau le Atua i le auauna ia Puni Leota. O le faatuina o le uluai ekalesia i Whaihimo i Porirua ma le susuga i le feagaiga ia Popo Su‘a, sosoo ai ma le faatuina o le ekalesia EFKS i Ketesemane i Porirua lava, o nisi ia o galuega sa iai se sao o lea tina, a o feagai ai ma tofiga i totonu o le ekalesia.
E taunuu i Aukilani i le 1977, e tasi le ekalesia EFKS, e na o le susuga i le toeaina ia Siaosi Ieriko i Grey Lynn. Sa amata galulue i le ekalesia i Puaseisei ma le susuga ia Manase Tuputala, sosoo ane ai ma le toeaina ia Faigame. Sa auai foi i le faatuina o le EFKS i Magele lava, lea o loo faifeau ai le susuga ia Petaia i le taimi nei. Sa toe agai ma galulue i le ekalesia i Mt Roskill i Stoddard Rd, ma le susuga ia Uaita Tofilau, ma toe suia agai i Owairaka ina ua iai le faaletonu i le galuega i Stoddard Rd.
Sa galue o se failautusi teutupe i le tele o ekalesia sa auauna ai e pei ona ta‘ua. Sa avea foi o se faiaoga Aso Sa, a o se taitaipese foi i totonu i le tele o aufaipese i totonu lava o le EFKS. E lē gata sa galue o se taitaipese, a o se faipese foi toe tusipese. O le tele o taleni e pei ona ta‘ua sa fesootai lelei ma lona soifua auauna, aemaise ai o se meaalofa mai le Atua, na soifua ae lava ma ia.
O tupuaga ma mātua na soifua mai ai, ma mea e manatua ai
O Rev Alefaio Alefaio o le tupuaga o lo‘u tamā, na faatuina le uluai ekalesia EFKS i totonu o le afioaga i Safune i Savaii. Sa faifeau faamisiona i Papua Niu Kini ma toe taliu atu ai i Samoa ma faavae le ekalesia e pei ona ta‘ua.
O le faletua o Alefaio o Laasaga, na faatoa maliu ina ua atoa lona 150 tausaga. O le aiga tamā o Laasaga, e tupuga mai i se tamaloa Siamani, ae o le tupuaga foi lea o i latou sa faavaeina le faili lauiloa ua faaigoaina o le Five Stars.
Tautinoga
Ou te faafetai i le Atua ona o galuega sa tuuina mai ma le avanoa e faapupula ai lona silisili ese e ala i taleni sa ou maua, ma o loo faaauau pea.
O le tele lava o taumafaiga ma galuega, o aoaoga sa ou tausinio i ai, e leai se atamai faapitoa, peitai o le Atua lava sa ia faasino ma taitai mai, ua mafaia ai le tele o galuega ma le olaga auauna. O mea uma foi ua maua e ao lava ona toe ave ai le viiga i le Atua, aua o Ia e ou mea uma lava.
O se tasi vaega tāua tele o lo‘u olaga, o lo‘u taumafai lea e faaeaina lo‘u aiga ma lo‘u nuu i Samoa. Ua ou talitonu foi i le faamanuia mai o Atua e ala i le faamanuiaga a mātua. O le usiusitai ma le faalogo i mātua ma fai pea lo laua finagalo e ui ina iai foi lo‘u manaoga, ae peitai sa faamuamua pea mātua. O le ala lea ua ou talitonu ai lava au i faamanuiaga a mātua. A o iai foi ni fanau e faitauina lenei tautinoga, ou te manatu e lu‘i ai i latou, ina ia faalogo ma usitai lelei i mātua.
Ua mautu lo‘u aiga i Samoa, o le aiga o lo‘u tamā i Safune, faapea foi le aiga o lo‘u tina i Iva, ona o lou lea manaoga ma le naunautaiga ia faia ni mea lelei mo le aiga o loo faamuli mai i laufanua ma nuu. O loo iai lava foi le manaoga e toe fia foi lava i Samoa pe a tusa ai fuafuaga ma le finagalo o le Atua.
Ia manuia lava Samoa, Soifua.
