Na faaiu le soifua galue o Tofilau i le galuega faapolofesa lava o le tausimai i le falemai tele i Middlemore i le tausaga e 1986. O le falemai mulimuli foi lea sa galue ai, a o avea ma tamaitai tausimai pasi a Niu Sila. O se tasi lea o tausaga pogisa i le soifuaga o Malelega, ina ua faamavae ma le tamā o le aiga ona o le valaau paia a le Matai i le lagi.
E pei ona ta‘ua i le vaega muamua o lona soifuaga, sa soifua a‘e lava ma lona naunautaiga, e fia auauna ma fia galue o se faiaoga peitai o le usitai lava i ona mātua, ma tali atu i o la‘ua manaoga ina ia avea ma tausimai, na mafua ai ona suia lea miti. O le tuua o le mafutaga ma le tamā o le aiga, sa maua ai ma le avanoa e toe liuliu ai ma toe manatunatu le tina, atonu o le avanoa lelei lea ua tatau ai ona agai loa e faatino lana miti sa soifua a‘e ma ia.
Suia le galuega faapolofesa sa galue ai (faiaoga Aoga Amata)
O le 1988 na ulufale ai i le ACE, (Auckland College of Education) pei ona sa iloa ai muamua, ao lei toe suia ma avea ma AUT, e pei ona iai nei. O le 1994 na toe aoaoina ai le isi laasaga mo le galuega faafaiaoga ina ua maua le tusipasi mo aoga amata. Na faaiuina foi le isi tusipasi ona galue ai loa o se faiaoga mo le aoga maualalo a McNaugton i Magele. Sa ia umia le faailoga o le Diploma of Early Childhood, a o galue ai i le aoga a McNaughton, a o galue faavaitaimi i le isi foi aoga a Mary McCallum i Magele lava.
E ui ina ua ausia ma oo le soifuaga o le tina i se isi amataga fou ma le faataunuuina o lana miti sa iai i le galuega faiaoga, ae sa lē mapu ai le soifua tauivi ma le maelega i mea lelei. O le soifua finau ma le saili malo, na mafua ai ona toe talosaga mo se avnoa e faavae ai se aoga amata, e faaaogā i ai agavaa ma le tomai. E ui ina lē faigofie foi lea laasaga ona e talosaga ma toe saili se laisene e faatino ai, peitai sa selau pasene le talitonuga e mafaia lava i le soifua tauivi ma le faamoemoe i le Atua.
Na maua le laisene e lesitala ai le aoga amata, ae peitai o le isi sitepu sa taumafai e savalia, o le sailia o se nofoaga ma se fanua e faatino ai le auaunaga. Sa fesootai i isi atunuu o le Pasefika e pei o Niue ma Rarotonga, ina ia mafai ona tutu faatasi, ona pau lea o le auala e faafaigofie ai le sailia o se nofoaga e tuufaatasi ai le faamoemoe mo le fanau.
O le tausaga e 1999 na faamanuia ai ma faatuina ai loa le aoga amata ma ua faaigoaina o le Puna o le Atamai e pei ona oo mai i le asō. O le nofoaga a le Southern Cross i Magele, na tali ane ma maua ai le nofoaga e pei ona faagaioi ai le Puna o le Atamai Aoga Amata, ma aoga amata a Rarotonga ma Niue.
O le nofoaga ua tuufaatasi i ai aoga a atunuu e tolu, ma sa faaigoaina ai o le Pacific Mini University. O totonu o le iunivesite laititi lea e pei ona faaigoaina ai e Tofilau, ua lima nei aoga o loo iai. E lua aoga a Samoa, lua aoga a Rarotonga, ae tasi le aoga a Niue. O le tausaga e 2000 sa faamaonia ai ma aloaia ai lea nofoaga ina ua tuuina mai le lesitala mai le matagaluega o aoga a Niu Sila.
E ui ina ua maua le nofoaga e pei ona sa manaomia, ae sa lē nofonofo ai pea le afioga i le tamaitai pule o le Puna o le Atamai, ae sa galue pea ma vaavaai i nisi avanoa e faalautele ai ma tatala agai i ai fanau mo le lumanai. O le naunautaiga ina ia agai pea i luma le aoga ma le manuia o fanau, sa toe talosagaina ai le matagaluega o aoga i le itu tau seleni, ae agai le isi talosaga i le pulega faaitumalo o Manukau mo se fanua.
