Talofa lava, Malo le folau, Faafetai foi mo le tapuaiga e manuia ai lavasiga ma faamoemoega o le vaiaso. O le sosoga lenei o le faamatalaina o le soifuaga o le afioga ia Tofilau Punipuao Malelega Tauiliili Tuivasa.
O le vaiaso na tea nei sa gata mai le tusitusiga i le soifua aoaoina, mai lava i le taimi o laititi sei tulou, seia oo mai i le taimi na maua ai galuega, peitai sa toe maua ai foi ma avanoa e faalauteleina ai le tomai ma agavaa e ala i aoaoga sa auai atu i ai.
Soifua galue (Tamaitai tausimai pasi tipitipi)
O le 1963 na uluai faigaluega ai i le falemai i Motootua, ina ua faatoa faauu ma iu ane i le aoga a teine tausimai i Motootua lava. E lua tausaga sa galue ai o se tamaitai tausimai pasi, i le matata poo le fale tipitipi i le falemai tele i Motootua, mai le 1963 i le 1965. O le tausaga lava foi lea e 1965, na tuua ai le atunuu ae malaga i Niu Sila, mo le faamoemoe e saili manuia mo le lumanai ma fia atinae atili le aiga.
Na taunuu i Ueligitone ma saili galuega i le falemai tele i lea aai. Ae pei ona ta‘ua i le vaega muamua o ana faamaumauga, sa lē taliaina e Niu Sila tusipasi sa agai mai Samoa i lena vaitaimi. E tusa lava po ua mae‘a ona aoaoina ma umia foi tusi faamaonia mai Samoa, ae sa lē mafai lava ona amanaia e Niu Sila, ma o le faapogai lea sa toe foi ai e faataunuu isi aoaoga, ina ia talia ma faigofie ona maua ai se galuega.
Na mae‘a le ono masina sa toe aoaoina ai e pei ona fautuaina e le falemai, ona faato‘ā lesitalaina ai lea ma amanaia loa o se tamaitai tausimai pasi a Niu Sila. Sa galue ai pea i totonu o le falemai tele i Ueligitone mo taotoga faapitoa o le fatu. E tusa ai ma lona agavaa sa maua i aoaoga, sa faapitoa lava i le tulaga o tipiga ma taotoga o le gasegase o le fatu (heart transplant, heart bypass specialist).
Galuega faavaitaimi (Part-Time)
A o galue ai i le falemai tele i Ueligitone, ae sa lē tuua ai foi le galue faavaitaimi i isi falemai e pei o le nofoaga o le ekalesia Katoliko lea sa faaigoaina o le Kalevalio i Newtown, i Ueligitone lava. Sa galue foi i le falemai o tina maitaga ma pepe fou i Porirua (Kenepuru Womens Hospital). Mulimuli ane na toe auauna foi i le falemai mo gasegase o le mafaufau i Porirua lava, ona sosoo ai lea ma le faatuina o se tasi o nofoaga tutotonu o le soifua maloloina i Porirua lava, ma o loo iai pea lea nofoaga e oo mai i le taimi nei.
O le tausaga e 1977, na asiasi ai i Aukilani, ma manatu o le a nofomau ai ona o nisi o mafuaaga tatau. O le falemai o tina maitaga ma pepe fou i St Helen i Mt Albert, sa uluai galue ai ina ua faato‘ā taunuu i Aukilani. O le matagaluega o tipiga ma taotoga, sa galue ai i totonu o le foi falemai. O le falemai lea ua lē o toe faaaogāina, ma na tapunia i se vaiatimi e lei mamao atu peitai o loo iai le a‘oga matata eseese i lea lava nofoaga e oo mai i le asō. Sa galue i St Helen, ae faavaitaimi i le tele o nofoaga ma falemai o tagata matutua (Rest Homes).
