Tofia Sui Palemia i le South Pacific AIDS Commission

Ua talia aloaia e le Sui Palemia le faaaloalo maualuga ua tofia ai le afioga Misa Telefoni, o le Sui o le Komisi a le Pasefika mo le gasegase o le AIDS, le South Pacific AIDS Commission.
Ua faaalia i se pepa o faamatalaga na faaiugafonoina e le Fono Tele a Malo Aufaatasi e nafa ma lea gasegase, le UNAIDS i Sineva ina ia tofu vaega tetele o le lalolagi ma ni Komisi e nafa ma tiute faapitoa aua le foia o le faamai oti i le lalolagi. Ua tofia le Afioga i le Sui Palemia ona ua tuua le malo e le Taitaifono sa iai, le susuga ia Dr. Langi Kavaliku.
O loo faamauina nisi o lauga faapea ma galuega a le Sui Palemia i le tau foia o lenei faamai. Sa avea foi o ia ma Sui Peresitene o le WHO, ma sa ia nofoia foi mo se vaitaimi le nofoa o le Peresitene o le WHO. Ma o le auai ai o le Sui Palemia i lenei Komisi, o se tulaga taua ma se faaaloalo maualuga mo Samoa.