Tofia Sieni Tualega-Voorwinden ma Ofisa Sili fou o le SIFA

Sieni Tualega-Voorwinden – Pule fou o le SIFA

O se tasi lenei o Faalapotopotoga a le Malo e lei leva talu ai nei ona faamalolo ai lona Ofisa Sili sa iai, le tamaitai ia Tootooaava Dr. Fanaafi Aiono-Le Tagaloa. E pei ona silafia o Tootooaava na ia mauaina lea avanoa ina ua fai i lagi le folauga a se tasi o tina ua tele tausaga o pulea lea faalapotopotoga a le Malo, o Alosamoa Erna Vaai.
Ae i se pepa o faamatalaga mai le Malo i le vaiaso na te’a nei, na ta’ua ai le tofia ai o Sieni Tualega-Voorwinden ma faauluuluga o le Pulega o Tupe Faavaomalo a Samoa poo le SIFA, Samoa International Finance Authority. O le ofisa lenei o Pulega o Tupe Faavaomalo a Samoa na faavae mai i le tausaga e 2005 ina ia avea ma ofisa e tali atu ai le Malo i le televavave o suiga ua iai nei le siosiomaga o tupe a le lalolagi. O le ofisa foi lenei a le Malo e sailia fofo talafegai e tali atu ai i manaoga o i latou o sailia auala e teu ma faasao ai a latou tupe.
Na maua se avanoa e talanoa ai ma Sieni o loo iai nei i Niu Sila ma ia ta’ua ai, na a’oa’oina o ia i le Iunivesite i Aukilani mai i le tausaga e 1995 – 2000 e pei ona sa faauuina mai ai i le faailoga o le Tusipasi Maualuga o Faatufugaga i Tomai Eseese (Bachelor of Arts) ma le Tusipasi Maualuga o le Faatufugaga i Tulafono (Lawyer). O se tamaitai Loia na faaulufaleina i totonu o le Asosi Loia a Niu Sila i le tausaga e 2002. Na toe foi mai i Samoa i le 2002, ma faaulufale ai i le Samoa Bar i le 2003.
Na uluai galue Sieni i Samoa i le Kamupani telefoni o le SamoaTel ma pule lagolago i le vaega o tulafono e gafa ma le aoina o aitalafu a le kamupani telefoni. O le tausaga e 2004 na galue ai ma tamaitai loia i le kamupani vaa a Samoa le Samoa Shipping Services. O le tausaga e 2005 na amata galue ai Sieni i le SIFA poo le Samoa International Finance Authority ma se tasi o tamaitai loia poo le Legal Officer. O le masina o Tesema o le 2016 na see ane ai Sieni ma avea ai o se tasi o pule lagolago i le vaega o Resitala faaletulafono seia aulia le tausaga e 2007 na filfilia ai ma Pule i le vaega lava lea o le Resitala faaletulafono. O le tausaga e 2009 na tofia ai ma Pule Sili Lagolago. O le 2016 na faamavae ai Sieni mai le SIFA ae malaga atu i Niu Sila ia Ianuari o le 2017 ma avea ai o se tasi o Pule i Aukilani mo le ofisa o le Pasifika Futures Limited e pei ona sa galue ai mo le umi e lua tausaga.
E tofia nei Sieni o avea ai ma Pule Sili o Galuega a le The Cause Collective New Zealand, o se faalapotopotoga i Aukilani e fesoasoani i mafatiaga faaagafesootai o tagata Pasefika. Ta’ua e Sieni, na mamao lava lona mafaufau e toe foi mai i Samoa e galue ai ona ua mautu foi lona aiga ma lana galuega i totonu o Niu Sila. O le masina o Aperila o le tausaga na te’a nei, sa faasalalau ai le avanoa lenei, e lei tusi talosaga i ai Sieni peitai ina ua toe faasalalau ai i le masina o Novema o le tausaga na tea nei, o i tonu lea na manatu ai Sieni ina ia tusi talosaga loa i ai.
Sa ia tatalo i le Alii ma ia iloaina ai o lona taimi tonu lenei e toe foi mai ai i Samoa e tautua i ona tagata, na toe faamatala e Sieni lona taimi sa galue muamua ai i le SIFA, sa ia galue fiafia ona o se siosiomaga lelei ma le fiafia na iai i lea vaitau a’o Pule Sili ai se tasi o tina ua fai i lagi lana folauga, o Alosamoa Erna Vaai. Na viia foi e Sieni le taimi o galue ai i lalo o le pulega a Vaai ona o se tasi lenei o faauluuluga a le Malo, e lē fiafia e filofilo i luma o tagata ae o se tina e manao e galue mai tua o tagata ina ia lelei faatino a latou galuega fai.
O le faamanuiaina ai o Sieni i lenei avanoa maualuga ua ia aualofa faapitoa ai mo lana pule muamua i le SIFA, o Alosamoa Erna Vaai. Ua sauni foi Sieni e toe foi mai i Samoa e galue ai mo le SIFA. O Sieni Tualega-Voorwinden e mai i Afioaga o Satapuala, Sagone ma Falelatai ma ua uma ona faaee iai le suafa matai o Tuifaasisina i Matamatanonofo.
O ia o se alo e faasino i le tinā ia Situli Tualega mai Pata Falelatai ma le tama ua fai i lagi le folauga ia Malaetele Ve’a Tualega o Satapuala. O Sieni Tualega-Voorwinden ua faaipoipo ia Barney Voorwinden ma e toafā o laua alo.