(mai le itu agavale) – Peresitene o le Filemu i Vitoria, John Bellavance, afioga Fuga Alofipo Lio Ale, faapea le sui Isalama ma le sui Musalemi na maua faailoga o le Amepasa o le Filemu

(mai le itu agavale) – Peresitene o le Filemu i Vitoria, John Bellavance, afioga Fuga Alofipo Lio Ale, faapea le sui Isalama ma le sui Musalemi na maua faailoga o le Amepasa o le Filemu

O le taimi o le faamanatuina o le Sisigafu’a o Samoa i le aai o Melepone i le masina o Iuni, na amata ai le faigapaaga a le Fono faufautua mo tagata Samoa i Vitoriale VicSAC ma le faalapotopotoga o  loo taulamua i le tausiaina o le filemu o le lalolagi le Universal Peace Federation.

Sa valaauina faaaloalo ai e le Fono le afioga i le peresitene o le vaega mo tina ma tamaitai o le faalapotopotoga i  Ausetalia le faletua ia Anne Bollavance i le Sisigafu’a, i se vaega o lana saunoaga sa faia na ia tuualalo ai mo se finagalo o le fono ina ia o latou amata galulue  e faatāuaina le anavatau mo le filemu lea e ao ona amata mai i totonu o aiga, faasolo atu ai i ekalesia ma le mamalu lautele o le atunuu.

Sa amata faatino lea faigapaaga i nisi o galuega fai faatasi ma fonotaga sa amata faalauiloa ai mo le silafia o le faalapotopotoga i Ausetalia aemaise o le aai o Melepone, tu ma agaifanua faa-Samoa aemaise lava o talitonuga o atumotu o le Pasefika, lea o loo taulamua ai lava le afioga i le taitaifono o le fono faufautua, le afioga ia Ale Alofipo Lio Ale.

O le Aso Toonai la na tuanai atu, na usuia ae le fonotaga faai’u faaletausaga a le faalapotopotoga lea mo le filemu a Vitoria, na valaaulia ai sui o le Fono Faufautua i le saofaiga a sui o malo eseese o le lalolagi ma talitonuga faatuatua eseese o loo avea Melepone ma o latou nofoaga tapuai, i le polokalame autu o le aso na tofia ai le afioga ia Ale mo se tasi o saunoaga autu e faatāuaina ai le filemu i totonu o aiga faapea faalapotopotoga a atunuu, lea e poutu i le talitonuga kerisiano.

Na faatino foi nisi o saunoaga e poutu i talitonuga faa-Musalemi ma Isalama aemaise foi o aoaoga o tausi ai le filemu i talitonuga hindu ma buda, a’o le auga o aute sa faaiu ai le fonotaga, o le sauniga lea na tuuaaoina atu ai faailoga taualoa e tolu mo sui o Isalama, Musalemi ma le talitonuga faakerisiano lea ua tofia ai le tamalii Samoa le afioga ia Ale e avea ma se tasi o amepasa o le filemu i Vitoria, Ausetalia ma le lalogai atoa.

O le saunoaga a le sui Isalama na atagia ai le maualuga ma le taualoa tele o lenei faailoga aemaise lava o le vaega tonu o le lalolagi e afifio mai ai latou lea e pito i sili ona tutupu ai vevesi ma taua pei ona silafia ai i Sasa’e Tutotonu, o se vaaiga uigaese lea i le Aso Toonai i feofoofoaiga ma le fusi faapea le faatalofa, o uiga vaaia o le filemu ua masani ai tatou, ae mo lo latou foi soifua pei ona saunoa i ai, e lē o se lima faatalofa ae o le fana e taui ma sui ai, e lē o se fusi foi e ofoalofa ai, ae ina ia sagatonu le auupega e fasioti ai, ae o ataata o taulelei  ma le olioli o le alofa na faaiu ai le polokalame o le filemu a Melepone.