“O le sosoo o le Fau ma le Fau i le muagagana e masani ai Samoa i ni taitai lelei o le atunuu e tulai mai e faafoeina se pulega mo le lumanai manuia o tatou tagata, o se muagagana lea e atue ai le faga i laua ma sulaina ai le alofa matalasi o le Atua ia Samoa ma ona tagatanuu i le tomai ma le silafia e taitai ai lona malo i le lumanai”.
Oni upu faalaeiau lea a Samoa atoa i Ausetalia ina ua faatalatalanoaina e le leitio o le Fofoga Moomia le afioga ia Lemalu Samau Tate Simi i luga o le FM 98.5 ma le www.fofogamoomiasamoalive.com” i le taeao o le aso Sa e tusa ai ma lona valaauina ma filifilia e avea ma Komesina Maualuga o Samoa e galue mai le laumua o Canberra i Ausetalia.
Ta’ua e Lemalu, o se agaga faafetai ma le viiga e faafoi i le Atua ona o se tofiga sa mamao ma sona iloa le malaga mai i lenei Konitineta tele e tautua ai tagata Samoa, e le gata ina faafetai i le Atua na tomua i ai lana saunoaga ao le agaga faafetai foi i le malo o Samoa i le alii palemia ma lana pulega o loo faafoeina lo tatou malo tutoatasi mo lea avanoa faaauro ua tofia ai o ia.
O le tofia aloaia o le afioga ia Lemalu e sui tulaga lea ia Dr Leiataua Kirifoti Eteuati lea na avea ma Komesina o tausaga ua alu, ina ua maea foi le vaitaimi o le afioga ia Feesago Fepuleai, ma ua see atu nei Leiatau mo lona tofiga fou i Iapani.
Ina ua seei mai la le afioga ia Lemalu Samau Tate Simi i lenei tofiga aloaia, sa muamua lava uia auala uma e tusa ai ma galuega faava-o-malo e lua Samoa ma Ausetalia, e faailo ai lupe o le Foaga ina ua tau lau o le faamoemoe i se sauniga mamalu ma talia aloaia ai e le malo o Ausetalia le sui o Samoa, ma sa faia lea sauniga taualoa ma le mamalu i le laumua o le malo tele i Canberra.
O le toe amatalia la o galuega fai a le Komesina o Samoa i Ausetalia o le muai faafeiloai atu lea i lona ofisa tutotonu i le laumua lea o loo galue ai le afioga ia Faatoatoa Luciano Fonoti ma nisi o le atunuu.
E pei ona silafia e le atunuu le soifua tautua o lenei tamalii ia Samoa ma ua iloga foi lona tomai ma galuega e fai e ala i le tele o matata sa galuea ai, e pei ona taua i se feiloaiga ma le sui o le Samoa Times ma le afioga ia Lemalu i ni tala tusitusia o lona soifuaga e faapea:
Sa fanau mai o ia i Fagalii ma aoga ai i aoga tulagalua seia ulufale atu i le Kolisi o Samoa (1967-71), maea lea ma ulufale atu i Wellington Polytechnic, NZ (1972-75), sosoo ai ma le NZ Central Institute of Technology (1976-77).
I le faaiuina o lona tulaga aoaoina sa tofia ai e galue mo le Ministry of Works, Head Office, Wellington, NZ, (1972-74), sosoo ai ma le Housing Corporation, Head Office, Wellington, NZ (1974-1977), i lona olaga galue i lea vaitaimi sa faigaluega ma aoga i le taimi lea i se sikolasipi a le Malo, i le matagaluega a le Department of Works, Samoa (1978), matagaluega a le Department of Labour, Samoa (1978-2003) ma le Ministry of Commerce Industry and Labour, Samoa (2003-2009).
Sa galue ma tofia e galue mo le Architectural Draughtsman (1972-77), Senior Arch. Draughtsman (1978), Inspector of Apprentices (1978-79), Labour Inspector (1979-80), Senior Labour Inspector (1980-1982), & Assistant Commissioner of Labour (1982-84), Commissioner of Labour (1984-2003), Chief Executive Officer, Ministry of Commerce Industry and Labour (2003-09).
I nisi o tulaga sa lauiloa ai foi lenei tamalii na avea ma Peresetene, Koluse Mumu a Samoa (1995-2009), na avea foi ma Samoa Rugby Union Executive (1986-2007), na tofia foi i le au a lakapi a le atunuu o le Manu Samoa Manager (1989-96 & 08) ma isi mau tulaga tofi maualuluga sa faaaoga ai le agavaa ma le silafia o lenei tamalii.
O le siitia mai la o le afioga ia Lemalu Samau Simi ma lona faletua ia Peseta Noumea Simi, faatasi ai ma o la alo e 2 tama, 2 foi teine ma o le afioga ia Lemalu e mai le afioaga o Matautu Lefaga, ma o loo suafa foi ia Samau mai lona nuu o Fagalii i le Vaimauga.
