“Lo‘u agaga e, ia e faamanu atu i le Alii o mea uma foi o i totonu ia te a‘u ia faamanu i lona Suafa Paia. Lo‘u agaga ia e faamanu atu i le Alii aua foi ne‘i galo se mea e tasi o ana meaalofa. O lē foi e malie ai lo‘u manao i mea lelei uma, ma lē na te faafouina lo‘u taulealea faapei o le aeto.
O le Atua o lo‘u malamalama ia ma lo‘u olataga, o le Atua o le malosi ia o lo‘u ola ou te mata‘u ea ia te ai? O ia lava o lo‘u ‘olo ma lo‘u papa ou te malu ai”.
O le pese lea o le loto ua tumu i le viiga ma le agaga o le faafetai e faafoi ai le faamanū ma le faaneetaga i le Atua, ona o lea ua faataunuuina aloaia fuafuaga uma ma le faamoemoe sa fau ao fau po mai, ina ua mae‘a ona talia aloaia ma faamautu mai i le taimi o le fono tele a le Ekalesia Faapotopotoga Kerisiano Samoa i Malua i lenei tausaga, le faaui atu o le faasolo o le Tofi Toeaina o le pulega a le EFKS a Aukilani i Saute, ma ua faasolo ai nei le susuga i le faafeagaiga taulagi o le aulotu a Weymouth i Aukilani, i le Faifeau Toeaina, Susuga Rev. Siloa Lologa Iosua ma lona faletua le tina ia Lotofoa Lologa Iosua.
Na matuā faatumulia le malumalu o le Ekalesia Weymouth i le Aso Toonai i le tofiga a le pulega a Aukilani i Saute, ona o le fia molimauina o le faaiu atu aloaia o le faasolo lea o le tofi toeaina, mai i mātua o le pulega sa iai le Susuga Toeaina, Susuga Rev. Tavita Taulealo ma lona faletua le tina ia Tumanualetulogologo Taulealo, ina ua la ausia nei le laasaga o le penisione.
O lea lava foi sauniga na faia ai se saunoaga a le susuga i le toeaina penisione, ma na faafetaia ai le pulega atoa aemaise o le lagolagosua a uso faifeau a o la tulai mai i le tofi. O lea la ua amataina nei le faatinoina o tiute o le tofi toeaina o le tamā ia Siloa L Iosua ma le faletua, lea ua faaeeina atu nei i mātua faaleagaga o le Ekalesia EFKS i Weymouth.
Ina ua mae‘a le sauniga o le tofiga i le malumalu, ona faasee ane loa lea o le paia ma le mamalu o le pulega i le maota o le Savali o le Filemu i le faaafe na saunia ma tapena lelei e le Ekalesia. O se faamoemoe lava na matuā lelei ma manuia lona faatinoga ma lona faataunuuina i lea aso auā na matuā faasopolia le paia ma le mamalu o sui uma na auai, mai aulotu uma o le pulega i faaaloaloga ma aga e masani ai aso faapenei.
Na ta‘ape le pulega atoa i lea aso ma le loto fiafia ma le agaga faafetai ona ua talileleia le galala o le tamaitai Amoa, i le maualuga o faaaloaloga na alo i ai le paia o le Ekalesia Weymouth, ona o pelega lava o lo latou tamā faaleagaga, le susuga i le toeaina ia Siloa ma Lotofoa Lologa Iosua auā na matuā faamalieina lava tagata uma.
Ia o faamanuiaga lava o le pale mai o le tofi fou na tele i ai saunoaga a nai tuaa sinasina o le pulega ina ia sagai ane manuia mai le Atua e tausia ai le galuega, aemaise foi o moomooga molipo mai le aufaigaluega uma auā le tulai mai o lau susuga i le toeaina Siloa Lologa Iosua ma lou faletua ia Lotofoa Lologa Iosua mo le taitaiina ma le tausia lelei o le Pulega.
O le upu moni e lē tuulafoaia lava e le Atua ona tagata, faatasi ai ma le talitonuga faakerisiano e iai le Atua i soo se mea tatou te faia. Ae o le upu a le tusi, “A uma ona tatou faia o se mea ua matuā lelei, ona tatou faapea ane lea, o i tatou lava o ni auauna lē aogā ma le faatauvaa i luma o le Atua”.
26
