E lē o toe mamao ona faamae‘aina loa lea o le nofoaga fou o le Aoga Amata a le Puna o le Atamai i Magele.
O le faleaoga fou o loo fausiaina nei o le lua lea i ai o nofoaga o le taumafaiga lava a le Aoga Amata.
O le vaega tupe e tusa ma le 1.7 miliona tala sa faamatuu mai e le malo e tauala ane i le matagaluega o a‘oga, faatasi ai ma seleni sa sailia lava e le Aoga Amata, lea o loo faatupeina ai lenei galuega tele i Cleek Rd i Magele i Sasae.
O le Puna o le Atamai o le a‘oga muamua lea ua latou muaimalae i lea foi fanua ma lea laueleele fou faato‘ā faato‘aina. O le fanua foi sa faapea ona faamatuu ane e le pulega faaitumalo a le aai tele i Manukau, e pei ona sa talosagaina e le komiti ma le pulega o le a‘oga.
O le agaga saili malo ma le lē nofonofo o le afioga i le tamaitai pule ma le pulega, faatasi ai ma le mafutaga a mātua o le a‘oga, e foliga mai o le ki lea ma le mafuaaga o le maua ane o faamanuiaga.
E lē gata i le seleni mai le malo, ae faapea foi le fanua ua fausia ai nei le faleaoga fou, auā lava le lumanai o fanau ina ia mautu ma lelei atoatoa le itu e faagaioi ai a‘oa‘oga.
O loo iai lava le faamoemoe e pei ona sa fuafua mai i le amataga, o se vaitaimi o Aukuso poo Setema foi o le a tatala ma faaaogāina ai loa le nofoaga fou o le a‘oga.
O lea foi nofoaga ua faapea ona faamaoni mai e le pulega o le a‘oga, o le a faaigoaina lava i le suafa o le tamaitai pule, le afioga ia Malelega a le Toelau, ma o loo ia umia foi le suafa matai o le Tofilau.
O se tulaga e faamanatuina ai le finau ma le saili malo o lenei tina mo galuega faatino, a o maua lona malosi. O se saunoaga mai lea i le mafuaaga ua a‘e ai le tofa i le pulega, mo le igoa o le nofoaga fou.
Ae na saunoa foi le tamaitai pule o le a‘oga, Tofilau Malelega, o le mafai ona faaaogāina gagana e lua i le a‘oga fou lenei, o le fuafuaga lava lea sa faataoto mai i le amataga.
O le naunau lava ina ia faalautele le tautua ma le auaunaga mo soo se aiga e lē gata i Samoa, ae ao foi ona silasila i isi uso a Pasefika, pe afai ae manaomia.
O loo iai nei le Puna o le Atamai i lona nofoaga tuai i totonu o le lotoā a le Southern Cross i Magele, ma o le a faaauau pea lava foi lea tautua e lē faamutaina. Ua faapea foi ona matala le avanoa mo fanau ma mātua e amata ai ona lesitalaina mo le nofoaga fou e pei ona ua toeitiiti ona mae‘a lea.
