Ua tele tausaga e lei toe faalogoina pe molimauina foi ni galuega ua faalauiloa e le Asosi o Tagata Faigaluega le PSA e pei ona silafia ai.
Ae o le vaiaso lenei na molimauina ai se faasalalauga faalauaitele ua faalauiloa ai auaunaga o loo ua ofo mai ni pa‘ū i tau o a latou auaunaga mo soo se sui lesitala o lenei Asosi tele i totonu o Samoa.
O lea na tapa ai se finagalo o lē ua tulai mai nei o le Peresetene o le PSA le Afioga Gaugau Mateo Ah Tong e faatatau i lenei asosi. Faaalia e lenei alii o lea lava sa iai le Asosi ma i latou na galulue auā le faaauau ai o auaunaga ma tiute faatino a le faalapotopotoga, ma o le komiti faafoe ua iai nei ua tele galuega faataatitia ua amata nei ona toe unai ona o le manatu ua tatau ona toe unai galuega faatino a le Asosi.
O se tasi o finauga tele na faato‘ā mae‘a atu nei a le Asosi na aofia ai le agai atu e fofoga se finagalo o tagata faigaluega i le Komisi o Faiga Palota, ona o le finauga ua unai ai le lē tatau ona faamavae o tagata faigaluega i le taimi e tausinio ai o sui palota o le faiga filifiliga tele a le atunuu.
O se tulaga e lamatia ai lo latou taumafai o ni tagata faigaluega ma le aiā e mafai ai ona ofi atu i upufai o Malo ae ia faia i se auala e leai ai se afaina o a latou tautua ma auaunaga ua tele tausaga o galulue ai.
O le isi galuega o loo feagai nei ma le Laulau a lenei Asosi o le finauina lea o le tulaga o iai aso malolo o tagata faigaluega ina ia mafai ona unai le faagasologa e tatau ona iai aso malolo ina ia mafai ona ave i taimi e tulai mai ai manaoga o tagata mo aso malolo ua mafai ona maua i tausaga taitasi, ae ia lē ta tasi e pei ona matele i ai le faatinoga o aso malolo o tagata faigaluega.
E tele ma anoanoai mataupu e mafai ona maua ai le lagolago mo tagata faigaluega ma o loo faaauau lava faamanuiaga na ofo atu e le PSA mo tagata faigaluega litaea pe ua malolo mai i auaunaga.
Na ta‘ua e le afioga Gaugau Mateo o loo faaauau auaunaga a le PSA ae o lea e lei tele ni mataupu na faapea ona agai e faalauiloa sei vagana ai le manaoga i le taimi lenei e toe faamanatu i tagata faigaluega o loo iai le Asosi e mafai ona agai i ai pe a tulai mai ni atugaluga i le faatautaiga o auaunaga i ofisa eseese o le malo o loo tautua ai.
O loo faapea foi ona vaaia se pa‘ū i le numera o tagata lesitala i le taimi lenei – e pei ona sa iai sui lesitala e silia i le to‘a 2000 i tausaga ua tea ma le to‘a 970 ua iai nei. Atonu o le lē toe faalauiloa o le Faalapotopotoga le mafuaaga tele o le faamaamulu o isi sui lesitala, ae e tatau ona matuā sili atu i le to‘a 2000 le numera o tagata lesitala.
O le Iuni a tagata faigaluega o loo i lalo o le Asosi lenei a le PSA o loo tatala ai foi le avanoa i tagata faigaluega e ese mai i tagata faigaluega a le Malo ma o loo faaauau foi ana galuega ae o loo toatele lava o tuufesili i le tulaga o iai ia faalapotopotoga.
“O loo iai le PSA ma o le malosi o lenei faalapotopotoga e faamoemoe lava i ona sui lesitala, o lea e iai le faamoemoe o le a faapea ona amata agai mai sui resitara ma o le a faapea foi ona faalauiloa atu le tele o mataupu o loo laga nei ma galulue ai le Ofisa o le PSA i Fugalei i le faatinoga mo le lelei atili o tagata faigaluega a le Malo aemaise tagata faigaluega i faalapotopotoga ma kamupani tuma‘oti.”
