E le mafai ona faatusatusa fesoasoani na maua i mafatiaga o le galulolo poo le sunami i le tausaga e 2009, i fesoasoani na maua i le tuanai o le afā o Eveni.
O le sunami e silia i le tolu selau miliona seleni na foai faameaalofa mo Samoa, ae o le afā o Eveni e lē oo i se ‘afa o lea aofaiga le tupe na maua mai i fesoasoani. A tuufaatasi foi fesoasoani eseese o le sunami e le aofia ai na o tupe na maua, e matuā sili atu le aofaiga o miliona pe a faaliutupe uma foai na maua.
O le mafuaaga foi lea o le ave pea o le tuualalo a le taitai o le Malo i aiga ua matuā afaina laoa ma maota ma leai ni meatotino tāua ona o le afā ma tafega faapea lologa, ina ia aua le nofoai ma faatalitali i le Malo ae toe tulai e saili fesoasoani mo le toe fausia o mea ua faaleagaina.
Sa maua se avanoa e fesiligia ai nisi o aiga ua aafia tele a latou meatotino ona o le leai o se fesoasoani mo i latou, pe a fua i le tuanai o le sunami na iai fesoasoani mai fafo mo le fausia o fale o aiga na faaleagaina.
O aiga e toalima sa oo i ai le tusitala e le mananao e faailoa o latou suafa, ae tasi lava le tali mai o le lē fiafia.
“Ou ke ofo lava a‘u i le leai o se fesoasoagi afai ua leai se mea e maua mai fafo, e kakau lava i le Malo oga aumai se faamama avega, a lē o gi gai laupapa ao gai apa ia pe maua foi gai pauga fao ua makua lelei kele”.
O le lagona faanoanoa o se tasi o tina sa oo i ai le asiasiga i le vaiaso ua tuanai.
O lea tina o loo nonofo pea ma lona aiga i se fale tapoleni, ma ua tuai foi ona agai e tau saili se laveai ma faufau se fale apa faasee e tau ina faamautu ai, ona e lei oo atu se masini e asu ese le palapala ua to‘a faataamilo i lo latou fanua ma le vaega sa iai lo latou fale.
O lea tina ma lona aiga e i se pitonuu o le Vaimauga, se tasi o nofoaga sa matua afaina i tafega.
O se tasi o tamā ma lona aiga sa nonofo i se vaega o le nofoaga lava lea e iai le aiga o le tina na fesiligia muamua. O lana foi tala faamama‘i e talosia ia alualu tafa le finagalo o le Malo ae silasila i se fesoasoani mo latou.
O lea tamā ma lona aiga ua alu uma fale ma meatotino aogā i tafega, ma o le taimi nei ua ia faafetaia nai fesoasoani ua maua atu mai nisi o lona aiga ma uo ua toe amata ai si a latou pisinisi laititi sa ola ai a o lei tulai mai le faaletonu.
“Ioe e lagona lava le faanoanoa i le lē maua mai o se fesoasoani, ae talosia ia aveave suaga a le vaa tele ae faapea mai le Malo ua maua sina laveai mo matou”.
I se feiloaiga a le Palemia ma nisi o tusitala na ia ta‘ua ai i le vaiaso ua mavae na ia toe fautua ai i tagata ua aafia fale ma isi meatotino ia aua le faatali ise fesoasoani ae toe galulue.
Na ia faaalia ai foi o seleni ua maua mai fesoasoani ua faatupe ai masini ma loli o loo faia le galuega o le la‘u o le lapisi ma le otaota ma sua auala ua faaleagaina ma toe faaleleia aemaise lava o le suaeseina o le palapala mai tafega ma lologa. “E tatau ona silafia e i latou o loo faitio o tupe lava mea uma”.
