Ua tuu atu i le faaiuga o lenei vaiaso le lauina o le iuga o se suesuega na faatautaia i le faamasinoga i le vaiaso na tea nei e saili ai se faamaoniga o le maliu o se pepe fou i le falemai tele i Motootua i le ogatotonu o lenei tausaga.
O se faalavelave lea na agai ai le tamaitai e ana le pepe ua maliu e faaleo lona tiga tele ma lona lē fiafia i le auaunaga faafomai, tausi soifua ma le faatosaga ua manatu lea tamaitai ua mafua ai le maliu o lana pepe fou.
O molimau a lea tamaitai ma lona tina faapea foi le itu a le falemai na tolaulauina i le vaiaso atoa i le sailiga lenei.
O le faamatalaga a sui o le Faamasinoga, afai e sau le faaiuga a le Faamasinoga ua faatamala le falemai i le taimi na fanau ai lenei tina talavou, e telē le avanoa e fai ai loa se tagi faasaga i le auaunaga faafomai pe faatausi soifua foi.
O le faamatalaga a se tasi o molimau o lea iloiloga, o le tina o le tamaitai na ma‘itaga ma maliu lana pepe, na o lava i le falemai i le taeaopo ae faatoa fanau lana tama i le afiafi po. E fanau ane ua tu ma ua faō le vaega i luga o lona tino i le moega i lea potu taofia fanau.
Faaalia e lea tina ua umi tele se taimi talu ona luluti tiga o lana tama ae o loo faifai mālie atu lava fomai ma le tala e lei taitai e tatau lava ona mānavanava, pe selasela pe onosai foi lana tama, ma na iu lava ina faalogo atu ua faufau ee mai lana tama i totonu ma le agai atu ua fanau seela le pepe a si ana tama ma na faapea ai loa ona faatonuina le tu i autafa o le moega sa taoto ai ma taumafai e fanau tu.
E tele isi lipoti na faapea ona folasia o lenei faalavelave ma na ta‘ua foi sa ola lava le pepe a le tamaitai talavou peitai e lei leva ona tuu i le pusa tioata (incubator) ae logo atu loa lea tamaitai ma lona tina e agai atu ua uma le ola o pepe.
E tuua‘ia lava e le tina fomai ma tausi soifua i le “lē amanaia o le ola o lana tama ma lana ma‘itaga” lea la ua mafua ai le uma o le ola o le latou pepe.
