Toe tusilima le Kapeneta ia Faimalomatumua mo le Komesina o Faiga Palota

O le fonotaga a le Kapeneta talu ai na faamaonia ai le toe filifilia o le Afioga Faimalomatumua Mathew Lemisio e faaauau ai i le tofiga o le Komesina o Faiga Palota a le atunuu mo le isi umi e tolu tausaga. E pei ona silafia o Lemisio na manumalo mai i faatalanoaga poo interviews na faatautaia ai e se komiti faapitoa ma tuuina atu ai i le Kapeneta mo le pasia aloaia ai.
O se tasi lenei o faauluuluga aupito sili ona talavou i Matagaluega a le Malo, e 39 tausaga le matua o lona soifua, ua faaipoipo ma e toalua lana fanau.
O ia o se alii loia mai afioaga o Tiavi, Alafua, Saleaumua, Lotofaga, Nofoalii, Saleimoa, Lefaga faapea ai ma Satupaitea i le motu tele i Salafai. O Faimalomatumua sa galue muamua ai i le galuega tusitala i le nusipepa o le Samoa Observer. Na toe malaga ai i Vanuatu e faaauau ai i le tulaga tau a’oa’oga faaloia lea na toe taliu mai ma galue ai i le ofisa o le Loia Sili a le atunuu, sosoo ai ma le Faalapotopotoga o le Malosi Tau Eletise poo le EPC, mulimuli ane galue ai i le ofisa o faiga palota e pei ona avea ai ma sui komesina o faiga palota. O
loo mulimulita’i lava Faimalomatumua i tulagaaao o si ona tuaā ia Tanuvasa Isitolo Lemisio ua faiilagi le folauga ae tele foi tausaga sa galue ai mo le Komesina o Faiga Palota a le atunuu.
O le lu’itau tele mo Lemisio ina ua toe filifilia ai i le Komesina o Faiga Palota, o le tapena ai lea mo le isi faiga palota tele a le atunuu i le tausaga e 2021. Faaalia foi e Lemisio, o loo galulue malosi lava le ofisa o faiga palota ina ia una’ia malosi le atunuu e maua ai le avanoa e faatino ai a latou palota ina ia iai se sao o tagata uma i le filifiliga lea o ta’ita’i o le atunuu faatasi ai ma le tafiesea o faiga faatosina uma e ala i tupe ma meaai e faalavelavea ai le faiga filifiliga a le tagata e tatau ona fai toatasi.
O le agaga fiafia ma le faafetai i le Alii na faaalia e Lemisio ina ua toe tofia ai o ia e le Kapeneta e na te toe tauaveina le tofiga o le Komesina o Faiga Palota a le atunuu.
Na ia faafetaia ai foi le Kapeneta ona o le faatuatuaga ua toe tuuina atu ia te ia mo le isi tolu tausaga i le lumanai. Saunoa Lemisio, na mae’a loa le faiga palota tele a le atunuu talu ai, na toe amata mai ai iina a latou polokalame faalauiloa i le unai malosi lea o le mamalu o le atunuu ina ia mafai ona resitala mo le avanoa e faatino ai le palota i le isi faiga filifiliga a le atunuu. O se tasi lenei o Ofisa o le Malo e fai lava sina tele o suiga ma teuteuga na faia i ana tulafono mo le palota e pei ona sa pasia talu ai e le fono usu a le Palemene. Ma o se laasaga foi o loo manatu Faimalomatumua e tatau ona mulimulitaia e le latou ofisa mo le avanoa e usitaia ai e soo se sui faatu o le palota aemaise foi o le aupalota.
I le taimi lenei o loo faagasolo pea resitala mo le faiga palota tele i le 2021 ina ia oo atu i le vaitaimi tonu o le palota ae aua ne’i toe tupu mai le tumutumu ai o le atunuu e resitala mo le faiga palota. O loo faamalosia foi e le Komesina o Faiga Palota le atunuu ina ia susū atu lava le tagata e fai lana resitala ae aua ne’i faamoemoe se’i alu atu le sui tauva e momoli aloaia o ia e faatino lana resitala mo le faiga palota.