Ua faafetaia e nisi o tagata faigaluega a le Tanoa Tusitala le Ofisa o le Leipa ma le tatou Ofisa i Samoa nei i le lagalaga ai o se lipoti faatatau i le lē totogia o ovataimi a tagata faigaluega o lea faletalimalo.
O le vaiaso na tea nei, e lei ‘asa se aso talu ona faalauiloa lenei faitioga ma sui o le Ofisa o le Leipa ua oo atu i le Faletalimalo auā a latou suesuega faatatau i faitioga.
O nisi o le aufaigaluega Samoa ua ono masina talu ona galulue ai i le Tanoa Tusitala, na o latou ta‘ua e avatu totogi muamua o lenei tausaga, ua lē aofia ai ma aso malolo o le Kirisimasi ma le Tausaga Fou.
“ae na faasoloatoa le matou galuega talu ai ua toatele tagata asiasi mai i le faletalimalo,” o se faaaliga lea a se tina e toalima lana fanau o loo saili pili aoga, talu ai e lē a‘ua‘u le totogi na maua.
O le oo mai la i le tatou ofisa i Apia na laga ai loa le lipoti ma logo le Ofisa o Leipa.
O le faamatalaga a le alii na ia faia totogi a le aufaigaluega, o le tulafono fou a le Malo e aofia ai tagata faigaluega nei o loo galulue i sifi.
O lea tulafono fou na ia ta‘ua ai ua mafua ai le faiga o totogi.
O le faamatalaga a sui o le aufaigaluega na oo mai ma faitioga, e avatu payslips ua sili atu i le ta‘i 90 ta‘i 100 itula faigaluega ae o loo totogi uma lava o itula masani (normal hourly rate).
Faaalia e Sydney Sua o le Ofisa o Leipa, e nafa ma faitioga o totogi, e leai ni tulafono a le Leipa faavaomalo e faapea mai ai e ese le tagata faigaluega sifi ese le tagata faigaluega i itula masani.
“O ai lava e faigaluega o le tagata faigaluega, ae e iai faiga faavae a le Komisi o Tagata Faigaluega a le Malo (PSC) e ono iai aiaiga na ma eseesega na,” o se faamatalaga lea a le sui o le Leipa.
“Ae o le faapea mai e lē totogia ai ma double time e leai ma ni tulafono faapea e faatatau i tagata faigaluega.
E lē mafai ona alofia lea tulaga e tatau lava i fale faigaluega ona totogi pe faaluaina le tupe maua i itula ia e galulue ai tagata i aso malolo.” “E mafai ona o latou faia ni suiga i taimi ma le ‘afa ae e lē mafai ona fai lea tulaga i taimi o Aso Sa ma Aso Malolo”.
E tolu nisi faitioga faapea na tulai mai i le faato‘ā amata ai lava o galuega a le Tanoa Tusitala i le ono masina talu ai ae o lea faato‘ā iloa lea ua toe oo atu nisi faitioga ma o le fautuaga a le Leipa ina ia o atu tagata nei e faitio manū e lei aafia a latou galuega na agai ai loa tagata faigaluega nei na faitio i le Ofisa o le Leipa i le vaiaso na tea nei ma mafai ai loa ona fai suesuega ma faamautu ai ma a latou totogi na toe maua e fua i itula ia e lei totogia.
O le taimi lenei o loo tālia foi e nei tagata ni tusi e faamaonia ai le avea nei ma tagata faigaluega tumau a le Tanoa Tusitala.
O se tuutuuga lea na fai i ai le Pulega o le Faletalimalo e mae‘a le tolu o masina o le latou faigaluega ai ona mafai loa lea ona iloilo le latou auaunaga ma faamautu ai loa le galulue i le faletalimalo.
O lea ua atoa le ono o masina e lei faia lava lea tulaga ma na ta‘ua e le alii o le Faletalimalo na tau atu i ai le tatou ofisa i Apia, o lea e sauni auā o Fiti e aumai ai faamaoniga nei pe a mae‘a lipoti mai i le faletalimalo lea i Apia.
E silia i le to‘a 100 tagata faigaluega mai i Samoa lava ia a le Tanoa Tusitala o iai nei ma le faamoemoe e faaopoopo lea numera pe a mae‘a galuega faalautele o iai nei a le Faletalimalo.
E tolu isi galuega tetele o loo faaauau a le Tanoa Tusitala ma o le tasi lenei o faletalimalo tele i totonu o Samoa aemaise pe a mae‘a ana galuega o loo faatino nei.
O le Tanoa Tusitala lea foi na aafia ina ua mu le vaega i luma o le faletalimalo i le lua tausaga talu ai, ua faatauina ma ua faatautaia nei e le Reddy Group o se kamupani o faletalimalo i Fiti ma ua faalautele i Niu Sila, Papua Niu Kini, Samoa ma Tonga ona lālā.
