O loo faatalia faiga filifiliga mo nisi o Ulu o Matagaluega ma Faalapotopotoga a le Malo ua toe faasalalau o latou tofiga ina ua mae‘a a latou konekarate tai tolu tausaga, ae o le avanoa o le Pule Sili o le Matagaluega o Faamasinoga ma Mataupu tau Faamasinoga ua muamua ona faia i ai le faaiuga a le kapeneta ma ua faamaonia ai le fautuaga a le Komiti sa feagai ma le faatalatalanoaina o sui na talosaga mo lea avanoa e toe tofia le Tofa Masinalupe Tusipa Masinalupe e na te faaauau pea le tulaga Ulu o lea matagaluega.
E tusa ma ni molimau na oo mai i le tusitala e toafā i latou na talosaga ae e toatolu na agavaa mo faatalatalanoaga poo le interview e aofia ai se tamaitai o loo umia se tomai faaloia.
Peitai ua manino le faaiuga ua toe faatuatuaina lea tamalii e le Malo na te tauaveina pea le tulaga Pule Sili o lea matagaluega tāua a le Malo. Sa galue Masinalupe i le tulaga Pule Sili a o avea le Tofa Seumanu Aita Ah Wa ma minisita o faamasinoga, sosoo mai ai ma le tofa Unasa Mesi Galo, ae ua toatolu nei minisita o le Matagaluega i le afioga i le Sa‘o Faapito, Afioga Fiame Naomi Mataafa o loo filifilia pea o ia e avea ma faauluuluga.
O le faasalalauga mai le ofisa o faamatalaga a le Malo le Press Secretariat o loo faaalia ai o Masinalupe Tusipa na amata galue i le Matagaluega o Faamasinoga i le tausaga e 1975 ina ua mae‘a ana a‘oa‘oga mai le Kolisi o Samoa. A fua atu i ai ua 32 tausaga o auauna lea tamalii i le Malo i le Matagaluega lava o Faaamasinoga.
O le tausaga 2000 na uluai tofia ai e avea ma Pule Sili o le Matagaluega ma ua tusa nei ma le fā ana nofoaiga i le tofiga.
O ia foi le uluai Pule Sili o lea matagaluega na filifilia e le Malo e tauave lea tulaga maualuga e aunoa ma ni faailoga faaloia, e fua i isi faauluuluga na muamua atu sa tofia, o i latou e umia lea tomai faapitoa.
Faaalia e se molimau faatuatuaina, o se tasi lea o tagata faigaluega a le Malo leva i lana tautua i se matagaluega e tasi na amata ai lona galue o talavou ma ua oo mai i le taimi nei ua faiaiga ma faaipoipo ma iai ona alo, ae o loo faaauau pea lana tautua i le Malo ma le atunuu. “O se ata manino i la‘u molimau o se tagata galue faamaoni ma punouai e auauna i ona taitai ma tagata lautele”.
O Masinalupe e mai le alalafaga o Safaatoa Lefaga, ma na te umia foi isi suafa matai o Feagaimaalii ma Soamauli i Lefaga lava, faapea le suafa o Tuuu i Siumu, Olailevā i Saanapu, Tupai i Saleimoa ma Faasala‘ia‘i i Fatausi.
O le avanoa lenei na faasalalauina mo le silafia lautele, ma e toafā na tusi talosaga ane i ai. E toatolu na agavaa mo le faatalanoaina o le avanoa.
