O se tulaga ua maitauina ai le faateleina o tuaa sinasina o papaaao i le aai o Melepone, ona ua lē gata i le tele o taumafa mai aso ua tuanai lea ua toe fafagu ma toe gaseseina e nisi o faleoloa Samoa i le aai, ae ua agia foi i luga o le tautua a le Fofoga o le Saolotoga, sa latou polokalame ua faaigoaina o le “ Alu aso ae sau aso”.
O lenei polokalame o le faatalatalanoaina lea o tuaa sinasina aemaise o tupu ma tamalii matutua o lo tatou atunuu, ma o latou faamatalatala tulaga eseese i le soifuaga i o latou taimi, e lē gata i taumafa ma meaai sa tele ina maua i le onosefulu pe fitusefulu tausaga talu ai pe valusefulu foi, a o laei ma lavalava.
O nisi o faama‘i sa maua ai, a o talitonuga ma tapuaiga sa amata mai ai le soifuaga, e oo lava foi i ala tetele ma taavale, a o femalagaa‘i i le sami ma le ea.
E tailua vaiaso ma faataunuuina le polokalame, ae ua faalogoina le toatele o nai tuaa sinasina e momoli le faamalo ma le faafetai i le faletua ia Lemalu Mesepa o loo nafa ma le tautua, aemaise le afioga ia Taefu Si‘umalae Silao o loo agai i maota ma laoa auā le faatalanoaina tuusa‘o mai o nai mātua.
O le molimau a le toatele, ua laki o tatou augatupulaga ma a tatou fanau, ona o le pologa ma le afu sisina na tauasa mai ai le sailigamalo a nai tuaa sinasina, faafetai i le tautua a le Fofoga o le Saolotoga ua tuutaliga mai ai le sao matagofie o mātua.
