O le amataga o le tausaga na fuafua mamao ai ma tapena le aulotu Aso Fitu Samoa Koneferenisi a Logan City o le toe afio mai e sailiili atili pe faia suesuega ina ia faaailoa i tupulaga le mafuaaga o le oo atu o le tala lelei i Samoa.
O le po o le Aso Faraile na amataina ai lea polokalame na toe faamanatu ai le le tele o vaega aemaise le usuina uma lea o pese LMS. O le taeao o le sapati Aso Toonai sa laei papa‘e uma ma pulou le itupa o tina ae o tamā sa iefaitaga ma ofutino papae.
E pei ona silafia e toavalu faiaoga Tahiti na oatu ma Ioane Viliamu na mafua ai ona faaigoa i le lotu Taiti ae pei ona silafia le toeaina e suafa ia Faueā ma lona faletua o Puaseisei, o i laua sa nonofo i Toga, o iina na feiloai ai ma Ioane Viliamu, o atu ai loa i Samoa.
O Faueā foi na ia taitai maia le malaga a Ioane Viliamu ma Papu i Samoa lea na oo atu ai le talalelei i le alalafaga o Sapapalii Savaii. O Malietoa Vainuupo na fai i lona uso o Malietoa Taimalelagi ma lona tamā o Malietoa Fitisemanu e talia ma faaafe le malaga ae na faaliliuina uma i le gagana peretania e Faueā ia Ioane Viliamu.
O le Matagaluega a le Childrens Ministry na faatinoina le taunuu atu o le talalelei i Samoa, aemaise lava le taimi na amataina ai le Ekalesia Aso Fitu i Samoa, i le po o le Aso Faraile sa amataina ai e le team 1, sa taitai ai To‘ivao Lama Puni, le taunuu atu o le LMS i Sapapalii, faatāuaina o taeao o le talalelei i Samoa, i le taeao o le Aso Toonai, na faatinoina ai e le team 2 le amataina mai o le Ekalesia Aso Fitu lava i Samoa, na taunuu atu i le 1891, ona o se alii Fomai ma lona aiga, na o atu nofo mautotogi i Matautu Tai e $6 i le masina, mo le 30 tausaga na o papalagi lava o fomai na lotu Aso Fitu i Samoa, seia oo atu i le 1915 na papatisoina ai tagata Aso Fitu Samoa muamua i Samoa, o palalagi na amataina le lotu, na latou faatauina le fanua i Vailoa o loo iai le aoga a le Ekalesia.
E momoli le agaga faafetai i le LMS na uluai ala atu ai le Talalelei ma faakerisiano ai tagata Samoa.
O le Aso Toonai aso 2 o Novema na faatāuaina ai le tu ma aga faaaloalo faasamoa, na leai se piano na faaaogāina, na pese fua uma pese i lea aso, ma oofu uma i le lanu paepae ona o le lanu lava lea e lolotu ai tagata i Samoa.
O le po o le Aso Toonai, na fai ai le aoga lalaga ato, ma‘ilo, ma le faiga o umu, ofuina o luau, vavaluina o talo ma isi lava galuega sa faaailoa atili ai i tupulaga le tāua o tu ma aganuu a le Samoa moni.
O le Aso Sa sa faatinoina ai le tele o tu ma aga faa-Samoa ma tu faaaloalo. E leai lava nisi ituaiga ipu na o launiu lava sa lalagaina ai ma‘ilo sa tausasami ai ma ato fueumu ma pola faatasi fala ninii sa faaaogāina e nonofo ai i lea aso.
O le tele o ia taumafa ma umu sa faatinoina lava e alo ma fanau ma o se fiafiaga foi ia i latou ona ua maua taimi e mafai ai ona latou faatinoina tu ma aganuu a Samoa.
Taitai: Sauita Magele;
Fesoasoani: Elsie Malaute.
O le faafeagaiga ole susuga ia Pr Ieti ma le faletua ia Alofa Ah Siu ae o le taitai toeaina o le susuga ia Elder Asuao Titimanu.
E tolu ‘au na vaevaeina i ai le aulotu, o le team na taitaiina e To‘ivao Puni, vaega lua –Lavea Peni Vaili ma le vaega tolu – Feta‘i Fitisemanu. O le fofoga o le faamoemoe o le susuga i le toeaina ia Tagaloa Sapati Iiga o ia foi o le faufautua o le komiti.
