Toe taufetuli foi i mauga ina ua lapataia se isi galulolo

E ese foi lagona na oo iai le Aso Lulu o le vaiaso na tea nei (taimi Samoa) ina ua toe faalogoina le sailini a le tineimu i le aoauli ma faamatalaga ua sosoo mai foi i luga o alaleo eseese ua faamalosia se isi lapataiga o se galulolo poo se galuafi ua agai mai i Samoa.
O se lapataiga o lea na manino mulimuli na maua uma e atumotu i le ogatotonu ma le itu i Sisifo o le Pasefika. E oo mai lenei lapataiga i Samoa o loo faalauiloa lava polokalame o toe sauniga o i latou na maliliu lea na fai faatasi i le aso na sosoo ai ma o loo fai lava ma tuua le Maota o le Malo, le Faletupe o Atinae, a o isi fale tetele ona o mafuie laiti na faaauau ona faalogoina i le atunuu.
O le mafuie lea na lulu i tafatafa ane o Vanuatu ma le Atu Solomona ae o le malosi ua leai se eseesega ma le mafuie tele lea na mafua ai le galulolo i Samoa, na mafua ai lava le vave ona taape tagata Samoa sa i ofisa ma kamupani, aoga ma isi nofoaga faitele i totonu lava ia o le taulaga o Apia.
E lei leva lava ona faailo le sailini ae vaaia loa le matua poloka o femalagaaiga i le auala e agai ai tagata o loo i le taulaga i Saleufi, Taufusi agai atu i Palisi ma le Mauga o Vaea.
E tusa ma le 20 minute o tau faaofiofi lava taavale i le fia o ese mai i le taulaga ma e manino lava ana tulai mai se galulolo i lea itu o le atunuu, e matua tele tagata e maliliu, ae o le toatele, e ui i fautuaga e tuu faalelei taavale i se nofoaga saogalemu, ua matua le faalogo lava tagata.
O le tele o ofisa na tuu lava taavale i ofisa ae savavali ae e matua toatele atu tagata na malaga lava i taavale.
O le tasi lea o vaega ua tele faataitaiga o faamalosia lava i le atunuu ina ia tuu taavale ae tamomoe pe savavali foi i uta ma e manino na muamua oo le toatele na savavali i Palisi nai lo i latou ia na malaga atu i taavale.
O le vaega o tali i faalavelave faafuasei na fesoasoani i leoleo sa i le taulaga i lea taimi e tau faatonutonu le o a taavale.
O le poplega lava o le toatele o le toe oo lava i faanoanoaga na vaaia i le vaiaso o muamua atu.
Na tapa se faamaninoga a le vaaitau ia Mulipola Ausetalia Titimaea ma na ia ta‘ua “E sili lava le mao i mealelei ma o le mafuaaga lava o le faailo o le sailini ma le faalauiloa o le lapataiga ona o lea na aumai sao lava i le nofoaga tutotonu o le tau mai i Hawaii faapea ai le isi lala i Fiti”.
Taua foi e Mulipola Ausetalia ana tulai mai se galulolo e i se vaimea o le lua itula ae lavea Samoa ona e fai si maomao o le nofoaga na lulu ai le mafuie lea i le sami.
E lei iai se tasi na faalogo i le mamao ma le umi lea na taua e le alii pule lagolago o le vaaitau i Mulinuu ae ua saili lava auala o le tagata ia ma o le tele o aoga na agai sao lava i Alafua ma Tuanaimato, aoga i Faleata ae o Vaivase ma Magiagi na tumutumu i ai aoga i le Vaimauga latou.
O le Mauga o Vaea ma Palisi na agai i ai le toatele o le taulaga o Apia. Na maea loa le lua itula ua faaleaogaina lenei lapataiga, vaaia loa le toe agai lemu mai o le mamalu o le atunuu ma agai sao ai lava nisi i o latou aiga ae pe toe lua itula maea galuega masani o le aso.
Ua le tele ni faamatalaga i le lapataiga ae ua na o le savavali lava o tagata ua manino le mafatia o nisi ona o le faapopoleina i le toe tulai mai o se isi faalavelave faalenatura faapenei.