Toe tauaaoina atu fanafanua i le Malo Samoa

Ua toe tauaaoina atu nei i le Malo Samoa fanafanua e pei ona sa toe aumaia i Niu Sila nei mo le faaleleia. O nei fanafanua e pei ona silafia ai e le toatele o loo faaaogaina lea i Mulinuu i le taimi e faia ai le tulai faaaloalo faapitoa, mo le sisina ae o le tagavai o le Malo Saoloto o Samoa i tausaga uma lava e faamanatuina ai le aso taua. O le taimi lava e sisiina ae ai le fua, o le taimi foi lea e faapapaina ai nei fanafanua i ni pa se luasefulu ma le tasi, e faamamalu ai le tulai faaaloalo.
O le faailogaina o le Tutoatasi o Samoa i le tausaga 1962 sa tauaaoina atu ai e le Malo Niu Sila nei fanafanua o se meaalofa i le avea ai o Samoa ma Malo muamua o le Pasefika ua saoloto mai pulega faakolone. O nei fanafanua sa fausia i Portsmouth i Egelani i le tausaga e 1892 ma ua selau sefulufitu nei tausaga talu mai le uluai aso na maea ai ona fausiaina.
O le tausaga e 1991 sa toe faafoi mai ai nei fanafanua mo le faaleleia o ni isi o vaega sa moomia ai le toe faaleleia ma toe auina atu ai i Samoa i le aso 20 o Me i le tausaga na sosoo ai 1992. O le amataga o le tausaga nei na toe talosaga ai le Malo Samoa i le Malo Niu Sila mo le toe siakiina o nei fanafanua ma ia toe saga faaleleia atili mo le saogalemu o lona faaaogaina ma faapea ai loa ona toe tuuina atu i le Vaegaau o le Gataifale, o i latou ia sa nafa ma lea galuega.
O le auai atu o le vaa o le vaegaau o le gataifale a le Malo Niu Sila i Samoa mo ni isi o a latou faataitaiga, na o latou muai toe tauaaoina atu ai nei fanafanua lea sa avea ai le afioga i le Minisita o Leoleo ma sui o Samoa e taliaina le toe faafoi atu o nei fanafanua ina ua maea ona toe siaki ma faaleleia atili.
Sa faaalia le faafetai e le afioga i le Minisita le afioga Toleafoa Faafisi ona o lenei galuega lelei ua maea ona faatinoina, aemaise ai o le taliaina pea e le Malo Niu Sila o talosaga e pei ona tuuina mai Samoa e ala lea i le faaleleia o lenei meaalofa, e le gata ina e manatua ai pea le tutoatasi o si o tatou atunuu i lona uluai tausaga 1962, ae ua fai lava lea ma faaaloalo e saga faamamalu atili ai le faailogaina o le Sisiga Fua a Samoa i tausaga taitasi. I le lipoti mai le taitai o le vaegaau a le fuavaa o le Malo Niu Sila o loo i Samoa, na ia faaalia ai le lelei atoatoa o nei fanafanua seia oo atu lava i le tausaga 2012 lea o le a faailogaina ai le limasefulu tausaga o le tutoatasi o si o tatou atunuu.