O le fesouaina o le mafaufau ona o faalavelave tutupu mai e mafua ai ona vaivai le loto ma tauau ai ina moloau atu nisi o faamoemoega sa faapea ona lavasi auā le lumanai ma ona moemitiga. Ae o ai foi se e lē solomuli lona mafaufau mai ni fuafuaga sa faataotooto pe afai ua avea se tasi sa tele ina faamoemoe i ai ia fuafuaga lelei uma.
E moni lava le upu, e na o le tagata e tumau lona faatuatua i le Atua e mafai ona ia faaauau pea lea moemitiga seia oo ina tino mai, auā o le tagata e faamuamua le Atua e lē mafai e faafitauli poo faanoanoaga o lenei olaga ona aveesea lona faamoemoe.
O se ata atoa lea na autū i ai le talanoaga ma o le tofa Sa‘u Osovale Brown, o le alii pule o le faleoloa a le QSI Pasefika Variety o loo faapea ona iai i Melepone. O le pisinisi o loo tautua ai le mamalu o le atunuu ma soo se tasi e ala lea i le gaseseina o taumafa atoa ai ma le faleoloa o loo faatau ai meaai tuuaisa, o meaai tuuapa, o nusipepa, ma soo se teuga faasamoa e pei ona masani ai i ana tu ma ana aganuu.
O le Aso Toonai na se‘i mavae atu nei na atoa ai le tausaga talu ona tatalaina lenei faleoloa i Hampton Park i le Setete o Melepone. O se tautua sa lei faatafatafa ona fai pe faapa‘ole auā le auauna matavela ma le agaga o le fai o le mea sili auā le tali atu i manaoga o tagata Samoa ma soo se tasi o loo agai atu ma taliaina lenei auaunaga.
E ui ina e lē faigofie le tulaga o loo iai foi Ausetalia latou, peitai sa lei ‘alo i se ataata o se laau le fetalaiga ia Sa‘u ma le aiga atoa ai ma le aufaigaluega i le faatinoina o le latou tautua i le lelei e gata ai.
O le Aso Toonai lava foi na se‘i mavae atu nei na tatalaina ai le isi faleoloa a le tofa Sa‘u i le numera 82 Somerville Rd, i Hampton Park lava. O lenei faleoloa o loo faatauina ai soo se lavalava i ona teuga eseese, o ofutino ma iefaitaga i le itupa o alii, atoa ai ma le tele o puletasi mo le itupa o tina ma tamaitai.
O teuga eseese faasamoa moni e pei o tautaliga, o pale, o ula, o vaitane, o vaikale mai Samoa ma le tele lava o mea e moomia auā laei a le atunuu. O loo maua ai foi i le faleoloa lea ua tatalaina nei le tele o CD pese ma DVD i soo se ituaiga o ata Samoa.
Na ta‘ua e Sau, sa sologa lelei lava mea uma a o faatasi ai ma le tina o le aiga. Peitai ina ua valaau le Atua i le tina o le aiga ia Elisa i le masina o Aokuso, o iina na matuā tele se luitau sa o la faafeagai mai ai.
Na ia ta‘ua ma lona leo tau lē lagona o le Aso Toonai na tuu ane ai ki o le faleoloa e pei ona tatalaina nei, o le Aso Toonai lava foi lea sa faapea ona valaau mai ai le Atua i le tina ia Elisa, o lona lima taumatau i le la pisinisi atoa ai ma si a la fanau. Talu mai le masina o Aokuso sa tuu atu pea i le Atua poo le ā se fuafuaga ma se tonu lelei o le a fai. Peitai na iai lona talitonuga, o le a lē avea le maliu o si ona toalua e faavaivai ai.
Afai lava o le loto o lona toalua ia faataunuu pisinisi auā se manuia mo aiga ma si a la fanau, o le a lē solomuli foi la ae faatuatua pea e lē tuulafoaina o ia e le Atua ma le faleoloa ua tatalaina nei. O le faleoloa ua amataina nei e lē mamao lava ma le faleoloa e pei ona faailogaina i le Aso Toonai le tausaga talu ona tatala mai i lena tausaga ua tuanai atu.
E na o le lua lava faleoloa e va ai ma o le faamoemoe atoa o le siitia lea o le auaunaga i se isi tulaga auā lava le faamalieina o manaoga o tagata faatau i soo se oloa.
Na ta‘ua e le tofa Sa‘u lona agaga faafetai i le Atua ona o le malosi ma le faatuatua sa ia tuu i lona loto e faaauau ma faamalosi ai e faataunuu fuafuaga sa la fuafuaina mai ma si ona toalua e ui ina o lea ua malaga i le lagi ae tuu mai na o ia ma si ana fanau ma nei faamoemoega ina ia faataunuuina.
Faailoa foi e le tofa Sa‘u lona agaga faafetai i le mamalu ma le paia maualuga o si o tatou atunuu ona o le faaauau pea o le latou lagolago atu i ana taumafaiga, aemaise o le latou faatuatuaga e ala lea i le gaseseina o mea taumafa, o le faavelaina o puaa se‘i tulou, o soo se gasesega lava e fiafia i ai le atunuu, o tupe lafo i Samoa ma soo se atunuu, aemaise la o le vai lea ua faatauina nei i le faleoloa ua aave tala i lona tāua ma lona aoga i le soifua maloloina lelei o tagata.
O lenei vai ua malolosi ai le toatele, ma o se vavega lava mai le Atua pe afai ae taumafa i ai lo tatou atunuu. E lē gata i le aogā i le soifua maloloina, ae o loo aogā lea i le faalusiina ai o pauna ma le faalaloina o le tino puta ma le toto maualuga. O nei tautua uma o le a mafai ona tali atu i manaoga a si o tatou atunuu pe a afifio atu i le tuatusi 80 poo le 82 Somerville Road, Hampton Park i Melepone.
