Toe tatala Jerry Collins, saoloto e taliu mai i Niu Sila

Na faafefe e se kegi Collins ona o se tamaitai

E tele le mau tala eseese na agiga i tusitusiga i upega tafailagi i le mafuaaga o le faalavelave na aafia ai le Numera 8 ta‘uta‘ua muamua a le Olopeleki, Jerry Collins, ae tasi le tala fiafia ua mautinoa nei mo si ona aiga, uo ma tagata uma o loo mulimulitai ma lagolagoina le taleni lakapi a lenei alo o Samoa, ua toe nei o ni aso ona toe taliu saogalemu mai lea o Collins i Niu Sila, ina ua toe tatala i tua mai le taofiga a leoleo Iapani lea na taofia ai i le aso 17 o le masina na tea nei, o Mati.
I tusitusiga a se tasi o nusipepa Peretania, “theguadian” i luga o lana upega tafailagi, o loo ta‘ua ai, o le faalavelave na tulai mai i le alii taalo, e iai se fesootaiga ma se kegi a ni tagata Brazil (Brazilian gang) sa latou faia ni faamata‘uga ia Collins, e mafua mai i le lē fiafia i le mafutaga a le alii taalo ma se tamaitai sa fai se la faigauo.
O le mauaina ai o Collins i le faleoloa e pei ona muai lipotia mai, na ta‘ua e lona sui faalauiloa, agent Tim Castle, o inā na sola ane i ai mo sona puipuiga mai lea kegi. I ni lipoti o loo ta‘ua ai na faamata‘uina Collins a o iai i lona fale i le pitonuu o Hamamatsu, o le mafuaaga lea na ia taga ai ni naifi se lua ma sola ese atu i se fale‘aiga, sosoo ai loa ma le agai atu i le faleoloa lea ma ia faaaliali ai se tasi o naifi, i lona mautinoa o le a vili e se tasi o le aufaigaluega leoleo. I se lipoti a le New Zealand Herald, o loo ta‘ua le tusa ma le 30 leoleo na oo atu ma puipuia le alii taalo a o latou agai ese mai fafo mai le faleoloa.
O le faamatalaga lea a le sui faalauiloa a Collins, agent Tim Castle, i le Stuff.co.nz, e faapea o le faigauo a Collins ma lea tamaitai na matuā feita ai le kegi, ma amata ai loa ona taumulimuli solo e lamalama le ola o le alii taalo.
Faaalia e Castle, ‘o uiga nei a le kegi na faafesootai ai e Collins lana kalapu lakapi, le Yamaha, ma faailoa i ai lona popolega i le tulaga lamatia o lona saogalemu.’
O le agaga o Castle, ina ia faailoa mai nei faamatalaga e tau taofia ai le tele o masalosaloga ma tala lē faavaea ua amata ona salalau solo e uiga i le faalavelave na tulai mai ia Collins.
Ua tatala i tua Collins ina ua malie e totogi se sala tupe e tusa ai o lona solia o aiaiga a le atunuu i naifi e mafai ona feaveai e se tasi. O le tulaga moni lea o le sala tupe ua totogi, ona o lona feaveaia o naifi i se tulaga e lē tusa ai ma le tulafono, peitai e leai se mea o ta‘ua ai le iai o ni uiga taufaamata‘u i le alii taalo, ma e leai foi se tasi na lipotia mai faapea na fefe pe na faamata‘uina e Collins i le taimi na taofia ai.
Na taalo lakapi Jerry Collins i Iapani mo le kalapu a le Yamaha seia oo mai le aso 28 o Fepuari lea na muta ai le umi o lana konekarate, ma na toe faamamafa mai faamatalaga a Castle, ae e lē o avea le faalavelave na tulai mai, ma itu e faapea ua lē toe talia ai Collins e taalo lakapi i Iapani, pe afai e toe manao ai lava o ia i se taimi o i luma.