Ua latalata mai le taimi mo le faiga palota e faaalia ai se finagalo o le atunuu i le mataupu e faatatau i le tulafono o loo faasa ai ona sasa tamaiti i totonu o le atunuu nei o Niu Sila. Peitai e itiiti se taimi o loo totoe mo le lesitalaina o suafa o i latou uma o loo fuafua e palota i lena faiga palota.
O lenei palota o loo sailia ai finagalo i le fesili, “Pe tatau ona faasolitulafono i Niu Sila le sasa o aoaiga lelei a matua i fanau?” (Should a smack as part of good parental correction be a criminal offence in New Zealand) ma e tatala i le Aso Faraile, 31 Iulai.
Taua e le National Manager of the Electoral Enrolment Centre, Murray Wicks, “Soo se tasi e oo atu i le Aso Tofi, 30 Iulai e lei lesitala lona suafa, lona uiga ua le mafai ona auai i lenei faiga palota.”
Saunoa Mr Wicks, e tatau i tagata ona lesitala o latou suafa ma faamautinoa ua toe faafou uma a latou faamaumauga i pepa e lesitala ai mo le faiga palota. Ina ia faamautinoa e maua e le ofisa le lesitalaina o lou suafa a o lei oo i le aso o le faiga palota, o le mea sili ona lelei e fai, o le faatumu o se form i le website mo le faiga palota, le HYPERLINK “http://www.elections.org.nz” www.elections.org.nz, ona print lea e saini ma lafo vave i le latou ofisa. A le o lena, e mafai ona e agai atu i soo se PostShop e maua ane ai sau form e faatumu ma toe faafoi atu i se tasi o le au faigaluega a o e iai pea iina.
E tusa ma le tolu miliona teutusi mo pepa palota o loo saunia e le Ofisa Sili o Faiga Palota, ma o le a lafoina atu i le meli. Saunoa le Ofisa Sili o Faiga Palota, Robert Peden, ua mae‘a nei ona saunia uma ma lolomi mo le lafoina atu i tagata palota. E tatau la ona maua e le mamalu o le atunuu a latou pepa i le meli mai le Aso Faraile, 31 o Iulai.
Saunoa Mr Peden, “o pepa uma o le faiga palota e lafo atu i le meli, e tatau foi ona toe faafoi vave mai ia matou i le meli”.
