E silia ma le to‘a 100 tagata sa auai atu e molimauina le faauuga a le to‘a 45 o nisi o sui matutua o le kamupani tufameli a le New Zealand Post.
O se polokalame tau a‘oa‘oga na faatautaia i le nofoaga autu a le kamupani i Te Riu o Tamaki Makau Rau i Highbrook. O le Aso Lua, aso 9 o Novema na faia ai lenei faauuga a le STEPS e pei ona faaigoa ai lea polokalame.
O le a‘oa‘oga sa a‘oa‘o ai tomai e faitau, tusitusi ma malamalama lelei i le gagana Peretania mo le aufaigaluega matutua, e lē o sa latou gagana autū le Igilisi.
O se fesoasoani tele ina ia maua e tagata faigaluega matutua a le kamupani tomai moomia ina ia ausia o latou moemitiga ia latou galuega, ma atoatoa ai foi le faatinoga o la latou auaunaga i le mamalu o le atunuu.
Na talia ma le agaga faafetai e le au a‘oa‘oga lenei polokalame. Na ta‘ua e nisi o latou, o le a lē toe mamā ai e faitau pe fenanui, aemaise i taimi e fai ai ni fefaasoa‘iga o manatu a le aufaigaluega, lea sa lē faigofie i le taimi muamua ona faaali ai ni manatu, ona o le faigata o le gagana.
Ta‘ua e se tasi o Pule a le New Zealand Post, Jon Andrews, o le isi itu ua sili ai ona taulau manuia le polokalame a le STEPS, ona ua sa‘o lelei le vaega (provider) e faatinoina le a‘oa‘oga, le vaega lea a le Lavea‘i Trust Inc.; e fesootai lelei atu i tagata faigaluega ma faigofie ai ona faaosofia le ‘au aooga e faaali o latou manatu e aunoa ma se matamuli, ae ua augofie ai foi le mafaufau e ave i fale le sosia ma le ‘oa o lesona aogā na a‘oa‘oina.
O le Lavea‘i Trust Inc. o se vaega o tagata Pasefika, ma o faiaoga foi sa faaaogā o ni tagata Pasefika, ua atili ai ona vave mafana sootaga ma le ‘au aooga, o tagata foi o le Pasefika.
O faiaoga o lenei polokalame, o le susuga Natia Tucker, Ligi Harris ma Sopo Sua-Elia.
O le vasega faauu i Highbrook, o le lona lua ai lea o vaega faauu a le New Zealand Post i lenei polokalame.
O le masina talu ai o Oketopa, e to‘a 35 tagata faigaluega mai le vaega a le International Mail Centre i Magele na faauu ai foi i le polokalame a le STEPS.
Ona o lenei polokalame, ua faitaulia ai nei le New Zealand Post e le Matagaluega o Leipa, o se Kamupani ua matuā sili ona lelei (Champion) i le maualuga ua iai tomai o ana tagata faigaluega.
Na faailoa e le Pule o Galuega a le Lavea‘i Trust (Project Manager) le tamaitai ia Naomi Saluni, le taulau manuia o le STEPS, ona o galuega soosootau‘au a le New Zealand Post, Lavea‘i Trust Inc., Engineering, Printing & Manufacturing Union, aemaise foi le lagolago mai a ana paaga faisaofaga (stakeholders), le Manukau Institute of Technology, Tertiary Education Commission Workplace Literacy Fund, Department of Labour Upskilling Partnership Programme, Puataunofo Health and Safety Programme, Open Polytechnic of New Zealand ma le Westpac Botany Junction.
