Ua toe taliu atu i Samoa le aumalaga a le “Samoa A” e pei ona malaga mai ma taaalo i Perth. Sa ta‘ua e le manager ia Vaaelua Aloi Alesana e ui ina malolo ia latou taaloga e lua peitai na lagona le agaga faagaeetia i le taumafai atili o nai alo ma fanau.
O le Coach o Mailo Potu Leavasa ma le assistant coach o Faafonuu Junior Leota. E to‘a 27 le au na malaga mai lea ua toe foi atu i Samoa i le po o le Aso Toonai 15 o Fepuari.
O le faaiuga o le masina nei, i le Aso Faraile 21 o Fepuari o le a amata ai le taamilosaga o le Pacific Rugby Cup, poo le PRC 2014. O lea taamilosaga faavaomalo na amataina o le IRB i le tausaga 2006, i le fia fesoasoani lea i le atinaeina o le taaloga o le lakapi Iuni i totonu o atumotu o le Pasefika.
O se tausaga muamua lea ua faatino ai lea taamilosaga i totonu o Ausetalia ma o loo fuafuaina e lima vaiaso e faia ai lea tauvaga. O se tausaga ese lenei i le taamilosaga ona e lē o iai se ‘au a Niu Sila o tauva, ma o se taimi muamua lenei ua faatagaina ai e le IRB le ulufale mai o le ‘au o Argentina.
O atunuu o loo auai i lea taamilosaga e aofia ai Samoa, Fiti, Iapani, Toga, Argentina ma au eseese o Ausetalia. O loo umia pea e Fiti le siamupini mai le tausaga 2009 seia oo lava i le tausaga lea na tea nei.
E to‘a 3 alo o Samoa o loo alala nei i Kuiniselani ua filifilia i ‘au o lea tauvaga. O le alii o Pat Fepuleai (o se alo e faasino ia Kaisa ma Paese Fepuleai, mai le alafaga o Lepa, Tapueleele ma Saleaula).
O Reuben Leilua (o se alo e faasino ia Leilua Gafa ma le faletua ia Lualima mai le alalafa o Faletagaloa Safune ma Pu‘apu‘a). O alii ia e toalua ua filifilia i le ‘au o le Manu Samoa ‘A’ ae o le alii o Sef Faagase ua filifilia i le ‘au o le QLD Reds ‘A’ team, o ona tuaa o Moutofu Bob Faagase mai Tuanai ma Asau, a o lona tina o Faapale Salani ua faiilagi le folauga, mai le afioaga o Paia i Savaii.
I se faatalatalanoaga a le sui o tala o taaloga i le leitio Penina o Asuisui (Muliagatele George Salā) ma le failautusi o le QLD Samoa Rugby Union Association, le susuga ia Lote Scanlan-Savelio, sa ia ta‘ua ai o se mitamitaga foi lea mo le latou asosi ona o alii uma ia e 3 ua leva ona taaalo ma fai ma sui o le ‘au o le QLD Samoa. E uigaese foi le taumafai atili ma le faaeaea i nisi o alo e toafā o le atunuu e alaala i Kuiniselani ua filifilia i le Reds e pei ona lausilafia, o le alii Jerry Taulagi – full back, Ben Tapua’i i le centre, Albert Anae i le hooker ma, Chris Feaua‘i Sautia i le centre toe uigi.
O le a iai se taimi ona toe auina lea o se ripoti ma ni ata o nei alo o Kuiniselani ua faamanuiaina ma fai ma fetu pupula i tulaga tau taaloga. Ia manuia lava taumafaiga o taaloga i le faaiuga o lenei masina.
