Ua mae‘a feiloaiga a le afioaga o Tanugamanono ma le aiga o Faumuina Tutuila Fereti, ae e lei iai lava se tasi, ma ua toe tālia nei foi se isi feiloaiga a le afioaga pe o le a filemu le toe foi atu o lenei aiga i o latou eleele ma maota ua savali nei i le lua masina talu ona faatea ese mai ai.
O le amataga o le vaiaso na tea nei lea na momoli ai e le afioaga o Magiagi le aiga o Faumuina Tutuila Fereti.
O le feiloaiga na talosagaina i le faaiuga o le lua vaiaso talu ai na ta‘ua ai e le alii Pulenuu o le a logo muamua le afioaga o Tanugamanono mo so latou finagalo.
E taunuu atu Magiagi e foliga mai e leiloa e Tanugamanono le fuafuaga o le toe foi atu o Faumuina Tutuila ma lona aiga.
E latalata i le itula o faatali sui o le afioaga o Magiagi ma le aiga faato‘ā oo atu nisi o matai o le afioaga o Tanugamanono, ma faapea loa ona faatautaia se ‘ava o le feiloaiga ma momoli loa le sāvali, o le manaoga o le aiga e toe foi mai i o latou fale.
Na manino le lē fiafia o le toatele o le nuu i le pisapisao o tina o le afioaga a o faaauau le feiloaiga a le nuu i totonu o le maota o le galuega i Tanugamanono.
E foliga mai e lē o fiafia lava le nuu e toe foi atu lea aiga, e ui o lea ua manino le faaiuga a le Faamasinoga o Fanua ma Suafa, e leai se mafuaaga tatau ua faatulai ese ai Faumuina Tutuila ma lona aiga.
O lea foi la na faatonu ai le tatau ona toe foi o lea aiga i Tanugamanono.
E ui i lea na ta‘ua e sui o le afioaga o Tanugamanono i sui o le afioaga o Magiagi na momoli atu le aiga, o loo tiga lava le nuu ma e se‘i toe feiloai ona mafai lea ona logo mai se taimi talafeagai e toe foi atu ai le aiga.
O ni faaaliga ua manino ai e lei sauni lava le afioaga e toe talia le aiga o Faumuina Tutuila Fereti i le afioaga. Na faaali le faagaulemalie o le afioaga o Tanugamanono ma toe lāgā ai feeseeseaiga ia na faaalia i luma o le Faamasinoga.
Na ta‘ua e le tofa Mataipule So‘a, o le matai Magiagi e faanoanoa lava ona o le tumau o le lē fiafia o le afioaga o Tanugamanono, a o lea ua mae‘a faigamea ma feiloaiga, ua manino foi le faaiuga a le Faamasinoga.
E ui i lea na tuumuli lava le afioaga o Magiagi, ae o le oo atu o le aiga e asi lo latou fale na toe lāgā ai foi feeseeseaiga i le va o tina o le EFKS Tanugamanono ma le faletua ma alo tamaitai o le Afioaga Faumuina, ma na iu foi ina oo atu Leoleo ae ua mae‘a ona tau faafilemu taugaupu i le va o tamaitai o itu e lua.
O matai Magiagi ia na taumafai e faafilemu ia feeseeseaiga ma tuumuli ese ai loa ma le aiga o Faumuina Fereti.
O le faamatalaga a le pulenuu o Tanugamanono, e lē o se va lenei o afioaga e lua ae o le aiga e tasi lea o loo tetee ai le toatele o o latou aiga i Tanugamanono, ma ua na o le aiga lava o Faumuina Fereti lea ua manatu le nuu e lē talia le toe foi atu i Tanugamanono.
E ui i lea na ta‘ua e le afioaga ua amanaia foi le iuga a le Faamasinoga o Fanua ma Suafa, ae e moomia lava le toe feiloai o le nuu ona toe logo mai lea o le Aiga o Faumuina.
O le taumafaiga e tumau se filemu ua toe foi ane ai la le aiga i Magiagi e faatali se tasi a le nuu tuaoi. Ae ua ta‘ua e sui o le Aiga o Faumuina Tutuila, o le a onosai lava ma tālia se talanoaga ae o le faaiuga a le Faamasinoga o loo manino ai le mafai ona toe foi atu i le afioaga.
O le mataupu ua tuu atu i Leoleo mo le faatinoga ae mo le filemu ua tālia ai nei se isi feiloaiga a le afioaga.
