Toe tali mai tagata tafafao e fesoasoani i le atinae na oo mai ai i Samoa

E le tau fesiligia le tele o le aafiaga le atinae o Tagata Tafafao Mai i Samoa ina ua afea afioaga sa iai nisi o faletalimalo ma apitaga tu matafaga aupito i saili mai i ai tagata mai i fafo, ae o le feau o loo unai i le toe amata ai o galuega faalauiloa o Samoa, o le itu lenei, e na o se vaega itiiti o le atinae lenei na aafia i le mafuie ma le galulolo ae o loo tele vaega o Samoa o loo maua ai le matagofie o loo tau saili mai pea e tagata asiasi mai ma e lei aafia i le galulolo.
I se faamatalaga a le tamaitai Ofisa Sili o le Pulega o Tagata Tafafao Mai, Matatamalii Sonja Hunter, o loo faaauau lava ona vaaia tagata asiasi tafafao mai i Samoa i lenei vaitau.
Taua e le tamaitai pule, o le isi toatele ua malaga mai ona sa tafafao mai i Samoa i tausaga ua mavae, ma o le malaga faalua mai ona o le fia ofo mai o o latou tomai faapitoa e pei o inisinia ma kamuta, tausi soifua ma fomai ma isi e toatele ona o le manaoga e fesoasoani mai i mafatiaga o Samoa.
“E iai nisi e pei o tagata tafafao mai sa nonofo i apitaga tu matafaga e pei o le Faofao i Saleapaga ua ofo mai lava le latou fesoasoani e alu sao i ia nofoaga ma o le mafutaga na maua atu i le tafafao mai ai i Samoa, ua faaaiga ai lava ma nisi o nei nofoaga,” o se faamatalaga lea a le tamaitai pule.
E tusa ma le 20 pasene o apitaga tu matafaga aemaise o faletalimalo i Samoa na aafia i le galulolo, ma o le toatele na laveaia mai lea faalavelave matautia na vave ona ofo mai isi faletalimalo ma apitaga tu matafaga e avatu sao ia i latou ia tagata tafafao mai ona o le fia fesoasoani lava i le aafia ai o tagata tafafao mai ona o le galulolo.
O le faaiuga o le tausaga faaletupe ua maea atu na molimauina ai le tupe tele o lenei atinae, ma ua maea ona folafola le Pulega i le faaluaina o le tupe faasili e tusa ma le $3 miliona tala i le tausaga faaletupe ua maea atu.
Faaalia e Matatamalii Sonja, o faamaumauga lata mai o le aofai o tagata tafafao mai i Samoa i le maea ai o le tsunami o loo vaaia lava le toatele ma o loo mafanafana lenei tamaitai aemaise o le Pulega e mafai ona faaluaina le tupe maua a lenei atinae i totonu o le isi tausaga faaletupe lea na amata mai i le ogatotonu o le tausaga seia oo i le tausaga fou, ma ua amata foi ona faagasolo faalauiloa ua totogi e le Pulega mo televise i Niu Sila aemaise Ausetalia, ma le manaoga ina ia tumau le fia malaga mai o tagata tafafao i Samoa.
Ua sosoo foi vaiaso e tolu o vaaia le taula o meli la‘upasese tetele i le uafu i Apia ae faagasolo tafaoga a le tele o tagata na malaga mai i itu eseese o Samoa. 
“E manino lava le toatele o tagata tafafao mai o loo iai pea le fiafia e malaga asiasi mai ma e le gata la ina iai le manao e asiasi mai i Samoa e tafafao, ae o lea foi ua toe foi mai le toatele e fesoasoani i le toe faaleleia o Samoa aemaise lava nofoaga na faamautu muamua ai nei tagata ia latou tafaoga i tausaga ua mavae”.
O loo faaauau ona faatino feiloaiga a i latou ua aafia atinae ona o le galulolo aua le fesoasoani ua faataatia nei e le Malo, lea foi ua fesoasoani mai ai ma le Malo o Niu Sila e ala i le $5 miliona tala Niu Sila lea na foai mai i le lua vaiaso ua tuanai aua lava le toe faafoi o nofoaga nei na talimalo i le faitau afe o tagata asiasi mai i tausaga uma i le lelei atoatoa sa iai, a o lei afea Samoa e le galulolo.