Ua mae‘a ona ave tusi a le Faalapotopotoga o Eleele o Samoa i nisi o aiga o loo nofoia eleele o le lisi a alii ma faipule o Vaitele-tai, ina ia tuumuli ese ae siitia i fanua ua saunia e le Malo i Falelauniu e nonofo ai, ae taatia fasi fanua o aiga o le nuu o Vaitele-tai.
E lei o ese lava aiga na faatūtū i ai lea faaiuga a le Faalapotopotoga o Eleele o Samoa ona o loo iai le pule malosi a se tasi o matai, Toi Ioane ina ia nonofo pea aiga ona o latou o loo faia le faiganuu.
O se tasi o aiga ua maliu lo latou tuaa poo se tamā matua, ua mae‘a ona eli le tuugamau ma faataoto piliki o le oliolisaga, ua ave i ai le tusi a le SLC (Samoa Land Corporation) poo le faalapotopotoga o eleele a le Malo ina ia aua ne‘i faia le tuugamau.
O le tusi mai le pule sili o le SLC e mafua i se talosaga a nisi o matai o le foaiala o Vaitele-tai ma le aiga e ana tonu le fasi fanua.
O le aiga e ana tonu le eleele e tusa ma le kuata eka, ua mae‘a ona totogi atu le latou seleni e lesitala ai loa lo latou fanua i le SLC ma totogi atoa loa mo le umiaina e i latou o se latou meatotino.
O le aiga o loo nofoia le fanua sa avatu ma nonofo i le eleele e se tasi o matai o Vaitele-tai le tofa Toi Aukuso ua maliu.
O tausaga sa aumau ai le aiga i totonu o le nuu sa faia a latou mea faalenuu i nisi o matai sa faia le faiganuu. Peitai o nisi o ia matai ua toe maopoopo nei ma isi vaega o le nuu sa va le fogavaa ma ua toe tasi ai lava le faiganuu a le foaiala o Vaitele-tai i le susū o Matai‘a o le Tama a le Fale, afio ai le Aloalii ia Galumalemana faapea afio o le Tapaau le afioga Tupuola, faapea le susū o le fetalaiga ia Toi, Tulaga ma Pula. O le aveai a le SLC na momoli e leoleo le tusi taofi i le aiga ma ua ave foi le fautuaga a le Malu o le Malo i le aiga ina ia tausisia le filemu o le mataupu ma ia usitaia. Faaalia e se tasi o leoleo sinia e mafai ona toe eli le tuugamau pe afai e lē finauaia le aiga ma le isi matai o le nuu o loo taulamua i le usui o loto o tagata ua mae‘a ona fai i ai le faaiuga a le SLC e tuua fanua o le foaiala.
O se lipoti na toe tuuina lata mai o lenei mataupu ua ta‘ua ai, o le tino maliu o le tamā matua ua lagomau nei i le aiga o lona toalua, ae ua toe talepe le tuugamau na fausia i le fanua i Vaitele-tai ina ua usitaia e le aiga le poloaiga a Leoleo ma le tusi mai le Faalapotopotoga o Eleele o Samoa (SLC).
