Ua faia le filifiliga a le alii fusu o Ofisa Vili, e toe fia foi e faaauau le taleni ma le taaloga faipele e pei ona sa fiafia i ai i tausaga ua mavae. E tusa ai ma se faamatalaga a le susuga ia Vili i se feiloaiga i le vaiaso talu ai, sa ia ta‘ua ai e faapea, ua atoa nei le tausaga, talu ona lē toe suluina meafaipele ma soli totonu o le maea i le tulaga o le taalo.
Peitai e ui ua umi ma ua leva ona lē toe taalo, ae iai lona talitonuga e leai se faiga mo ia lava ia, ona toe tapena ma sauni le toe foi ai i le maea fusu.
Na ia ta‘ua, o le mea lava e iai le loto, e iai foi le auala e faia ai. O loo iai pea lava foi lona faatuatuaga atoatoa ia te ia lava, ma o se tasi lea o faamalosiaga tāua i loa toe taumafai i le taaloga.
O le Aso Faraile, aso 7 o Setema o le tausaga nei, o le a faataunuuina ai le manaoga o le susuga ia Ofisa Vili e pei ona ia faamaonia mai. O le paga faapitoa o lea po o le susuga ia Ofisa Vili ma le alii o Shaun Salisbury.
E ono isi paga faaopoopo o le a faataunuuina i lea lava po. E iai foi nisi o alo o Samoa o le a faapea ona taaalo ai. O le kalapu a le susuga ia Vili, le Vilis Boxing Gym Promotions, o loo faatautaia ia fusuaga, i le Netball Stadium i Browns Rd Manurewa.
O le a le faamoemoe o lou toe foi i le maea? Ona o loo iai pea le lagona ma se manaoga ia te au, ou te fia aumaia se fusi tāua poo se siamupini mo a‘u e faamae‘a ai, ma faamanatu ai la‘u taaloga e pei ona ou fiafia i ai. O le uiga o lea faamatalaga, e ao ina iai se pine faamau ma se faamaoniga i lo‘u lava olaga taalo, sa ou faia le taaloga, ma sa faaiu foi i se taunuuga lelei ma le manuia.
A ou toe manatunatu i vaitaimi ua tuanai i le amata mai o lo‘u taumafai, sa sologa manuia ma lelei faaiuga o taaloga sa faataunuuina. Ae peitai ona o le augata e koleni, ma le faatuutuu i le paie sa mafua ai ona peiseai a galo atu le fiafia i ai. O le ala moni lava lea, ua ou toe manao ai e tatau ona toe lalaga lo‘u fiafia e faaauau ai fusuaga.
E iva a‘u fusuaga sa faia, e tolu fusuaga faapolofesa, e fitu manumalo, ae lua faiaina, e tasi le malo i le tu‘i oti, ma o la‘u fusuaga faapolofesa mulimuli foi lena. O le isi lea faamalosiau tele mo a‘u, ua mafua ai ona ou toe taumafai i le taaloga.
Afai ua mafai ona faia e nisi foi uso taaalo, e leai foi la se mafuaaga ma se faalavelave o lo‘u mafaia ona fai e aunoa ma se masalosalo. O se tasi vaega tāua, ona o le uso ua mafai ona fesoasoani mai, o se tasi foi o tamafanau a le atunuu, sa lauiloa ma sa maoae foi lona tomai i le taaloga i lona vaitaimi.
O le susuga ia Sam Leuii, o ia lea o lo‘u taitai i le tulaga o tapenaga (trainer), a o le afioga ia Tagaloa Jonny Namura, o loo lagolago ia Leuii. O le 1997 i le faato‘ā 18 o tausaga sa amata taalo ai, o le taimi nei ua 33 o‘u tausaga, ae faafetai o loo iai pea se manatu e faaauau le taleni.
