“O le kilikiti faasamoa, o le tatou measina, ma e mo Samoa,” Pastor Poni Fonoti, taitaifono o le taamilosaga kilikiti a ‘Le Mau a Pule ma Tumua’.
E le mafai ona galo le kilikiti faasamoa moni, le polo pulu ma le pate laau, le lape ma le faaili, le taaloga e togiga i le ie solosolo, ae tamoe i seevae tosotoso; e pulou i le pulou launiu, e fai ‘olo i lala poumuli, ae ata mai lava lona amataga e oo i le faaiuga, ona o lape, faigasiva ma tāga eseese e faatinoina i totonu o le malae.
Pe tupe, pe leai se tupe e maua mai ai, o le fiafia lava o le mea tāua, o le taaloga na taaalo ai o tatou tuua anamua, na tuufaatasi ai afioaga, maopoopo ai aiga, fealofani ai Ekalesia, e tasi ai se nuu, auā e moni lava, o le measina a Samoa, o le taaloga e pele i le loto, ae talofa e, ua tauau ina mou atu.
O le auga lea ma le faamoemoe o le taamilosaga kilikiti faasamoa a ‘Le Mau a Pule ma Tumua’ lea na faamae‘a le latou sailiga siamupini i le Aso Toonai o le faaiuga o le vaiaso nei, e pei ona faia i le Ngati Otara Park.
O le visiona a Le Mau a Pule ma Tumua, “Ia taofi mau le tatou taaloga kilikiti faasamoa (o le tatou measina) ina ia aua ne‘i mou atu i le vaai ma mamulu atu ma o tatou lima. Ia toe faaolaolaina le taaloga kilikiti faasamoa i Samoa ma soo se itu o le kelope o loo aumau ma nonofo ai ni Samoa, ma ia taaalo faatasi ai ma fanau ina ia o latou ave le taaloga o le kilikiti faasamoa agai i le lumanai.”
O le tolu ai nei o tausaga o le taamilosaga, 2010 na amatalia ai, na manumalo ai le aukilikiti a le Ainiusami mai Matautu Lefaga, 2011 na siamupini ai le Familia mai Vaipuna, a o lea foi la ua toe suipi foi le aukilikiti lenei a Familia i le tamilosaga lenei a Le Mau a Pule ma Tumua 2013, e pei ona se‘i mavae atu nei.
O se taamilosaga matagofie lona faatautaia ma le tuufaatasiga, aemaise o le faagasologa o le faamoemoe i le Aso Toonai. Ua toe fafagu mai ai lagona o aso la, o taaloga kilikiti a nuu ma alalafaga, ekalesia ma faalapotopotoga, e pei o le vaaiga sa molimauina i le Aso Toonai. Sa mataina taaloga taitasi ma le finau o au uma, peitai, o le upu lava e masani ai tatou i aso faapenei, ‘e lē mua uma ni vaa’.
O le taaloga mulimuli na saili siamupini ai le au a le Maliolio ma le Familia; o se taaloga mataina tele ma le vave ona mae‘a. Na tatā muamua Maliolio, maua ‘ai e sefuluiva, sefulufā pe. Sa manatu nisi ailoga a vave ona maua ‘ai ina ua tatā le Familia.
Peitai na ona osofai lava e le au tamua a Familia luga o le malae simā, faatea loa ma le Maliolio, pa lava lena polo i le pake, pa a lua, ua tau ‘ai e lua.
E lei leva lava ona tuli ‘ai le Familia ae maua ma manumalo ai i le la suega siamupini ma le au a le Maliolio mai Samalaeulu. Ua toe suipi ai nei foi le Familia mai Vaipuna; ua lua tausaga sosoo o manumalo i le taamilosaga kilikiti lea, a Le Mau a Pule ma Tumua 2013.
