Au siamupini Eagles i le taamilosaga o le Saili Malo

Ua lua tausaga sosoo o afisi faalelei e le aukirikiti a le Eagles le siamupini o le taamilosaga a le Saili Malo e pei ona faatinoina i le Aso Toonai ua mavae 23 o Mati i le malae i Point England i Glen Innes. E fitu ‘au sa auai i lea taamilosaga ae lua Pool sa vaevaeina i ai. O le Pool A sa iai le Tama o le Malaka, Saints, ma le Eagles, ae o le Pool B sa finau mai ai le Mali’oli’o, Mountain Boys, Maata ma le Manutagi.

E lua ‘au e sao mai i luga e fai ai le Top 4 ma o lea sa ofi mai ai le ‘au a le Mali’oli’o ma le Manutagi i le Pool B, ae o le ‘au a le Egles ma Tama o le Malaka na ofi mai i le Pool A. I le semi-final na finau ai Tama o le Malaka ma le Manutagi ae o le isi semi-final na iloilo mai ai le Eagles ma le Mali’oli’o, ma o le iuga o nei taaloga na manumalo mai Tama o le Malaka i le la taaloga ma le Manutagi, ae suipi mai le Eagles i le la taaloga ma le Mali’oli’o. 

I le sailiga siamupini na fai si faafaigata o finauga a Tama o le Malaka ma le Eagles, na muamua tatā le Eagles ma latou mauaina ‘ai e 131 ona tuli lea e Tama o le Malaka; e mae’a le pē toe 32 ‘ai o loo totoe. Ma o se taaloga mataina lea taaloga i le faaiuga o le vaiaso i le finauina o le manumalo poo ai e sola ma le siamupini o lenei tausaga.

E lē mua uma ni vaa ae na iloga ona pepese fiafia le Eagles ina ua manumalo i le Tama o le Malaka. Pei ona faaalia e le susuga ia Fiu Tala Pauga o le taitaifono lea o le taamilosaga o le Saili Malo, e ese le manaia o lea taamilosaga mo ‘au taitasi. O le tausaga ua mavae na amata ai le Saili Malo e fitu ‘au sa iai, ae $1,200 le manumalo sa iai. O le tausaga nei o loo tumau pea ‘au e fitu i le taamilosaga ae ua siisii i luga le manumalo o le ‘au siamupini lea ua see atu nei i le $1,500. Ma e foliga mai o loo agai i luma le lagolago a ‘au taitasi ma le komiti faafoe i le faapolokalameina o lenei taamilosaga.

Na mafua ona faatino lea taamilosaga ona ua lē mafai ona toe faaauauina le taamilosaga sa fai lea sa faaigoaina o le Vaipuese ma o le ala lea sa toe tasi ai se lagona o le tofa ia Asiava Tuipe’a, Fiu Tala Pauga ma le susuga ia Leilua e faatino se isi taamilosaga kirikiti ina ia faaauau ai pea le fiafia o alo ma fanau e atia’e lea taaloga i totonu o Niu Sila. E lē gata i fanau talavou ae iai foi isi tagata matutua e lē uma le fiafia i lenei taaloga, ma o le ata lava lea o le faamalumalu o tagata matutua i ‘au taitasi a nuu ma kalapu pe a oo ina fai se taamilosaga. 

O le faamoemoe maualuga o loo agai iai se lagona o le komiti i lea taamilosaga o loo iai se fuafuaga i le tausaga fou pe a aulia i le alofa o le Atua, o le a mafai ona filiina ai se ‘au a le Saili Malo auā le taamilosaga o le Teuila lea o loo faia i Samoa, e lē gata i lea, o loo iai foi se lagona ia oo atu i le tausaga fou ua toe faaopoopo nisi ‘au o le Saili Malo ma toe siisii i luga le faailoga tupe e maua e le ‘au siamupini. 

O le Saili Malo, e toasefululima le autaaalo i le ‘au, ae e fai le ova 4 ma le ova 6 ae tutusa lava tulafono ma isi taamilosaga o loo faagasolo nei i Aukilani e pei o le PIMKA ma le Teuila. O le tofa ia Fiu Tala Pauga o loo taitaifono i lenei taamilosaga, o le tofa ia Asiava Tuipe’a o loo faafoeina polokalame o taaloga ma le afioga ia Leilua o loo fai ma failautusi ma teutupe o le taamilosaga.