Na lasi le vaaiga i aso uma e fa sa faagasolo ai vaega eseese o faaaliga a fanau aoga i Aukilani nei, a o faaali uma a latou teuga ma vaega eseese o a latou aganuu sa mafai ona latou faatinoina.
O le Aso Lulu seia oo i le Aso Toonai o le vaiaso na tea nei, (17-20 Mati, 2010), ma sa matauina e leai se aoga na alo tamala ia latou tapenapenaga mo le Polyfest o lenei tausaga. O le tausaga lenei 2010, ua atoa i ai le 35 tausaga talu ona faavaeina mai le Polyfest.
E 63 aoga na faaulu ai a latou vaega tauva ua sili atu nai lo le tausaga talu ai, e 59 aoga sa tauva.
O le tausaga e 1976 na uluai amata mai ai e nai aoga e 4, o Seddon High School lea ua taua nei o Wesern Springs College, le kolisi a Aorere, le kolisi a Mangere, ma le kolisi a Sir Edmund, ma ua alagatatau ai ona toe valaaulia le kolisi a Sir Edmund, e avea ma talimalo (host) i le Polyfest o lenei tausaga.
E 5 fata poo stages sa vaevae i ai le tauvaga o Maori, o le Atu Kuki, o Niue, o Tonga, o Samoa. Ae na iai foi ma se isi fata poo se Stage sa tuufaatasi i ai faafiafiaga a nai vaega laiti o loo iai fanau aoga, e pei o Initia, Saina, Korea ma isi.
Mo le Stage lava ia a Samoa, o iina sa sili ona lolofi atu i ai tagata maimoa, ma o le vaaiga lava lea i tausaga uma e fai ai le Polyfest.
O vaega a vaevae i ai le tauvaga, o Lauga faa-Samoa, o le Pese o le Aso lea sa tulimataia ai foi gaioiga a le Fuataimi, o le Sasa ma le Faaluma, le Mauluulu, le Taualuga lea e siva ai le Taupou poo se Manaia foi.
Sa vaili uma foi i le tauvaga le tulaga i le matagofie o togiga a ausiva taitasi, aemaise foi le Ulufale mai ma le toe Ulufafo atu pe a maea faafiafiaga.
E lei faigofie le galuega a alii ma tamaitai faamasino, peitai na mafai lava i lo latou tomai i vaega eseese o le aganuu faa-Samoa, ona maua ai le togi sili mo le aufaafiafia foi ua maoae ana taumafaiga i lenei tausaga.
Ma o se isi foi lena matatia na ausia e aoga e pei o le Kolisi a Avondale, lea ua faaiva ai i lenei tausaga ona sola pea ma le manumalo i le aofaiga o aoga tuufaatasi a tama ma teine, ae toe matatia ai foi le kolisi a Otahuhu, i le toe tulai mai foi i le tulaga lua mo le iva foi tausaga sosoo.
Mo aoga e na o alii, ua sola ai le kolisi o St Peters ma le mea atoa, ae sola tamaitai o le McAuley High School ma le tulaga muamua o le vaega o aoga na o tamaitai.
O le mamalu o le laulau a faamasino i le fata a Samoa sa auai: Afioga Tofaeono Tanuvasa Tavale; Afioga Fuimaono Tuiloma Alolua; Afioga Muliagatele Vavao Fetui; Afioga Tuiataga Faafua Leavasa-Tautolo; Susuga Faletua Vini Lale Peteru; Faletua Rosemary Mose.
Iuga o le Tauvaga Aoao – Samoa Stage
GIRL’S SCHOOL
1ST McAuley High School
2ND Auckland Girls’ Grammar School
3RD Kelston Girls’ College
BOYS SCHOOLS
1ST St Peter’s College
2ND Kelston Boys High School
3RD St Paul’s College
CO-ED SCHOOLS
1ST Avondale College
2ND Otahuhu College
3RD Aorere College
BEST BEHAVED SCHOOL
Dilworth College