Toe sui mafaufau o Tapaau ma Salelologa

E lei atoa le vaiaso talu ona faalauiloa le finagalo tetee o le mamalu ia Tapaau ma Salelologa i le suiga o le itu auala e feoai ai taavale, ae o lea ua toe faalauiloa le suia o lo latou finagalo.
O le faamatalaga a le Fofoga o le Falefia, le faiupu o le nuu, Taotua Ioane Matamua, o le mafuaaga ua toe suia ai le finagalo o le afioaga ona e faigata le oo atu o le afioga i se tasi o faipule o le afioaga, le Afioga Gatoloaifaana Amataga Alesana Gidlow, o le Minisita foi lea o le Soifua Maloloina.
O le tasi lea o faipule o Salelologa, ae o se alo foi faasino ia Luamanuvae Tofilau Eti Alesana, “o le Tapaau e puipui i ai Salelologa”, o se faaaliga lea a Taotua Ioane.
Na logotala loa le malo i le tetee i le vaiaso ua tuanai a le afioaga, talo loa se talanoaga a le afioaga ma le tamaitai Minisita ma o se feiloaiga na talosagaina ai e le afioga Gatoloaifaana, Tapaau ma Salelologa mo le lagolagoina o le taumafaiga a le Malo.
O le folafolaga a le afioaga na faalauiloa muamua e faapea o le a leoleo uma e le malosi o le afioaga aemaise o le pulega a alii ma faipule magaala uma o le afioaga ma o le a faamalosia le uia pea o le itu auala o loo feoai ai taavale i le taimi lenei.
Sa logo uma foi taulelea o le afioaga e aua lava nei lotea fua meatotino a le Malo nei aafia se isi i le tulafono, ae o le a faatonutonu e le nuu avetaavale uma ina ia tumau i le itu tuai o loo feoai ai taavale. O le aso 7 o Setema lea na faaalia e le afioaga o le a amata ai a latou leoleoga.
Peitai na maea loa le feiloaiga a le afioaga ma le tamaitai Minisita o lea la ua toe suia ai le lagona o Salelologa, o le a agai ia e opogi le faamoemoe o le Malo ina ia suia le itu auala e femalagaai ai taavale e amata atu ia Setema o le aso 7. Faaalia e le Fetalaiga ia Taotua, “E lei faigofie le oo atu o le afioga i le Minisita ma e faigata o lona tuaa o se tasi ua faasino i lenei foi afioaga”.
 “Ae na sasao le tuumuli a le Minisita ae na umi se taimi o fefulisai faalaau mamafa finagalo o le nuu.
E le faigofie le tetee ua maea faalauiloa, ae e ui i lea e pei o le mafuaaga lava o le le fiafia o le afioaga ona o le tele o masina talu ona faalauiloa suiga a le Malo ae e lei oo mai lava se isi o i laua na faasinolima i ai le Itumalo e fai ma sui o lenei afioaga ma isi afioaga o Faasaleleaga Numera Tasi i le Palemene. 
O lea la ua oo mai le tasi o i laua nei, ia ua malie atoatoa foi le afioaga i lana faaaliga ma lana talosaga,” o se faamatalaga lea a le tofa Taotua.
Na tapa se finagalo o le tamaitai Minisita ma e lei tele sana faamatalaga sei vagana ai le faafetai ona o le mafai ona toe suia le finagalo o Tapaau ma Salelologa.
“E ui lava e foliga ua talitualimaina le feiloaiga e pei ona laga e le afifio alii ma faipule, ae o le mea sili o lea ua feiloai ma ua maua ai ma se tasi ina ia opogi le finagalo o le Malo,” se saunoaga a le tamaitai Minisita, le Afioga Gatoloaifaana Amataga Alesana Gidlow.
 Faaalia e le tamaitai Minisita o le popolega lava, nei avea le tetee o le afioaga ma auala e saga faatuputupulaia ai le fenumiai o avetaavale ma iu ai lava ina tulai mai faalavelave ma aafia ai foi soifua o le afioaga i luga o alatele.
Ua maea ona faalauiloa e le Pulenuu o le afioaga o Luatuanuu, Tainamu Iva Manase, e le o auai foi lona nuu i le tetee e pei ona lipotia i le vaiaso na tea nei.
“O loo saili tele e lo matou nuu poo ai ua toe tusitusia faa‘aū ia ua tuuaia ai le tetee ma tauleagaina ai lo matou nuu ae oo mai i le taimi nei e leiloa poo ai ua faia lea tulaga solitulafono,” o se faamatalaga lea a le alii Pulenuu.
“E lagolago e Luatuanuu le taumafaiga o le suiga o le alatele, ma o a lava atinae a le Malo o loo taumafai atu i le matou faaitu, o loo lagolagoina lava e le afioaga”.
O le taimi lenei e na o le afioaga o Laulii lea ua agiga le tetee, ae na taua foi e le alii Palemia o lea ua manino mai foi i suesuega a leoleo i pou o faailoilo ia ua aveese, ma tusitusiga ua fai i luga o le alatele ua faasese ai faa‘aū ua maea vali ai le auala, e na o ni tagata toaititi o loo faia lea tulaga ma e le talafeagai le tau atoa ai o le afioaga o Laulii i ia faiga solitulafono. 
O se tasi lea ua taua e Papalii Li‘o Ta‘eu Masipa‘u, le Komesina Lagolago o Leoleo, ua sola ese ma Samoa.