Toe saili Siamupini foi le Eels ma le Chiefs i le Super 9

 Aana Chiefs – Ina ua mae’a ai lana semi final e pei ona manumalo ai i le Legends
Aana Chiefs – Ina ua mae’a ai lana semi final e pei ona manumalo ai i le Legends

O ‘au e lua na sailia le siamupini o le taamilosaga o le Super 9 i le tausaga na te’a nei lea foi ua toe manino mai le toe feiloa’i ai i le sailiga siamupini mo le Super 9 o lenei tausaga. O le ‘au a le Aana Chiefs ma le Vaimauga Eels na feiloa’i i le sailiga lea o le siamupini mo le Super 9 i le 2017 e pei ona sa manumalo ai le Eels.

Mai i Semi finals i le Aso Toonai na tea nei, na molimauina ai le finau o le semi final muamua i le va o le Aana Chiefs ma le Legends, o se taaloga na vaaia ai le malosi tele o le osofa’i a le Chiefs i le amataga ma o latou laasia ai le laina sikoa a le Legends mai le numera 7 ia Jacob Mapu ma le numera 8 ia Lio Lolo, na vave ona tali mai le Legends i le latou sikoa mai i le kapeteni ia Mavaega Maiava a’o lei ta le malologa o lea taaloga. O se tasi o poutu o le laina i tua a le Chiefs le susuga ia Tulolo Tulolo na ia le mafai ai ona faaauauina le taaloga ina ua faamanualia ai i lona aao.

O le afa mulimuli o lea taaloga na vaaia ai le malosi o le taaalo a le Chiefs ma sosoo ai a latou sikoa e pei ona o latou faatoilalo ai le Legends e 35 i le 17. O ‘au foi nei e lua na sailia ai le isi semi final o le taamilosaga lava lenei i le tausaga na tea nei ma faatoilalo ai e le Chiefs le Legends, lea foi ua toe manumalo ai le Chiefs i le la semi final i le tausaga nei.

 Vaimauga Eels – I le mae’a ai o le semi final e pei ona manumalo ai i le Navigators
Vaimauga Eels – I le mae’a ai o le semi final e pei ona manumalo ai i le Navigators

O le isi semi final na sailia lea e le siamupini o le tausaga na tea nei, le ‘au a le Eels ma le ‘au mai Lefaga ma Safata le Navigators, o le ‘au lenei a le Navigators sa tulaga 8 ai i le tausaga na tea nei peitai ua maoa’e lana taumafai ai i lenei tausaga ina ua toatele nisi o tama fanau mai isi Iuni Lakapi faaitumalo ua mafai ona taaalo ai e pei o le sui tuai muamua o le Manu Samoa le susuga ia Fautua Oto.

O le ‘au foi lenei a le Navigators na faiaoga ai le susuga ia Laauli Rudy Leavasa lea o loo avea ai nei ma faiaoga taiulu o le ‘au filifilia a Samoa mo i latou e i lalo ifo o le 20 tausaga le matutu (Under 20’s).

Etele vaega faaletonu na iai le afa muamua o lea taaloga e pei o polo e lusi, toe pasi i luma, ae o le afa faaiu na iloa ai le malosi o le osofa’i a le Eels ma o latou faatoilalo ai le Navigators e 32 i le 20.

Faaalia e le kapeteni a le Navigators le susuga ia Tuaniu Tuaniu, ua tele gaioiga sese a le latou ‘au faatasi ai ma le tulaga faaletonu o le tau na mafua ai ona le tau lau o le faamoemoe o le Navigators, ma o se tulaga maualuga foi ua oo iai a latou taumafaiga i lenei tausaga i le Super 9 pe a fua atu i le tausaga na tea nei.

Ae i le siamupini o le tausaga na tea nei le Eels na faafetaia ai e le alii kapeteni ia Ripine Fualau le toe finau ai o le Eels i nai minute faaiu o le la taaloga ma le Navigators, saunoa Fualau, ua misi e le latou ‘au nisi o a latou tama taaalo faamoemoeina le susuga i le alii kapeteni ia Patrick Faapale ma le afa ia Ionatana Tino lea o loo auai ai i le Manu Samoa 15 i le la taaloga ma Siamani i le faaiuga o le vaiaso nei i totonu o laufanua o Siamani e faamautu ai se avanoa o le Manu Samoa i le ipu o le lalolagi i le tausaga fou.

O le aso 21 o le masina lenei o Iulai ua faamoemoe e faagasolo ai le sailiga siamupini o le taamilosaga lenei o le Super 9 i le va o le Aana Chiefs ma le Vaimauga Eels.