Toe saili se Taitai o le Tautua Samoa

Malolo Vaai Papu Vaelupe i moliaga o faiga palota

O lagona o le faanoanoa na molimauina i sui faipule o le Tautua Samoa sa auai i le lauina o le faaiuga o le faamasinoga tau palota i le itumalo o Vaisigano Numera Tasi, ina ua faamaonia moliaga e tolu o faiga faaalatua i faatosina o le palota na faato‘ā mae‘a i le masina na tea nei faasaga i le faipule le afioga i le Aloalii, Vaai Papu Vaelupe. O tuuaiga nei sa faasaga i le sui faipule e autū i le tuuina atu e Vaai o tupe i le Tuua o Asau faapea ma le tuuina atu o nisi seleni i tagata palota mai lea lava afioaga o le itumalo o Vaisigano Numera Tasi.

E tuuina atu lenei lipoti mo le faasalalauina e lei maua mai le faaiuga tusitusia a le faamasinoga o loo maioio mai ai tuuaiga ma moliaga tonu ua faamaonia. E lei auai Vaai Papu i le lauina o le faamasinoga ona sa i Savaii. Ua tuai ona logo ona na faaalia e lana loia na faato‘ā logo atu le lauina o le faaiuga a le faamasinoga i le ‘afa o le valu o le taeao o le Aso Faraile 29 o Aperila 2011 (ananafi) ae o le aso foi lea e lauina ai le faaiuga. Sa fautuaina le loia e le Faamasino Sili na te logo i lē na faasaga i ai le tagi le faaiuga ua taunuu i ai le mataupu.

I le faaiuga a le faamasinoga na fofogaina e le alii faamasino o Justice Pierre Slicer sa toalua ma le Faamasino Sili i le suesueina o molimau o lenei tagi, na faaalia ai le faamaonia o tuuaiga a lē na tagi (petitioner) o Tufuga Gafoaleata Faitua. Peitai o le mae‘a suesueina o molimau na lagolago ai tuuaiga poo counter-allegations a Vaai Papu faasaga i lē na tagi, ua taunuu ai le faamasinoga i lana faaiuga ua lē mafai ona faamaonia, ma ua faaleaogaina ai ia moliaga.

O le taunuuga o le faiga suesuega a Vaisigano Numera Tasi ua soloia ai ma le tofi faipule o Vaai Papu Vaelupe. Ae peitai e lē o manino mai i le faaiuga pe toe faia se faigapalota laitiiti a lea itumalo, pe o le a tofia loa lē na tagi o Tufuga Gafoaleata Faitua e tauaveina le tofi faipule o le itumalo. Na pau le faamatalaga i le taunuuga o suesuega poo le conclusion, o le a logoina e le faamasinoga le Fofoga Fetalai o le Palemene e tusa ai ma le faaiuga o le mataupu.

I fafo o le maota faamasino ina ua mae‘a ona lau le faaiuga i le Aso Faraile 29 o Aperila 2011, na vaaia le laufofoga fiafia o aiga ma i latou uma na lagolagoina Tufuga i le tagi tau palota, ona ua lē faamaonia moliaga sa tuuaia ai e Vaai Papu ma lana au lagolago.

O le itu mautinoa ua avanoa nei le nofoa o lea itumalo ma ua avanoa ai foi ma le tofi taitai o le Tautua Samoa sa umia e le Aloalii. Na faaalia e se tasi o faipule o lea vaega faaupufai le afioga Afualo Dr Woods Salele, o le a fono le faafaletui e talanoaina ai le tulaga i le tofi taitai, ae o lona manatu e ave lava le faaaloalo i sui faipule matutua o le vaega faaupufai.

“Ua matuā malosi lava le matou vaega, ma e leai se mea e faigata ai le toe filifilia o se isi i le tofi taitai auā e agavaa uma matou”, o lana saunoaga lea. Ua tautino mai foi Afualo afai e fai uma ni palota laiti mo itumalo o loo iai tagi o le palota i luma o le faamasinoga, o loo mafanafana le Tautua Samoa na te maua ni nofoa se lima e faaopoopo i le latou numera ua iai nei.

Ua totoe nei na o le 12 nofoa o le Tautua Samoa ina ua soloia le tofi o Vaai Papu le taitai o le vaega faaupufai, ma afai ae taunuu le lima o nofoa faaopoopo i ni palota laiti o le a ausia e le Tautua Samoa le 17 o nofoa.