Ua toe filifilia nei le susuga Mikaele Pesamino le tasi o uigi saoasaoa a le Manu Samoa i le au lakapi taitoafitu a le atunuu, ina ua lē mafai ona taunuu ona faamoemoega i le Konekalate na sainia ma le kalapu o le Sales Sharks i Peretania lea sa taulamua ai le Global Bro Sports o loo faauluulu i se tasi o tamafanau a Samoa ua iloga foi ona tulagaaao i le lakapi le susuga Lauaki Fereti Tuilagi.
O le vaiaso ua mavae na toe ulufale ai Mikaele Pesamino i le tolauapiga a le au taitoafitu a le Ma1u Samoa ma ua faaalia ai e nisi, ua toe atoa nei tino o le tama a o tapena le ‘au mo taaloga a Malo o le Taupulega poo le Commonwealth Games i Initia i le masina fou o Oketopa.
O le susuga Lauaki Fereti sa nafa ma le tapenaina uma o le konekarate a lea alo o le atunuu ma faapea ona tuua ai Samoa e Pesamino mo lea faamoemoe. Peitai sa faatalitali o ia i Niu Sila mo nisi o vaega o tapenaga, ma iu ina toe foi ai i Samoa e lei toe maua mai se faamatalaga i le Global Bro Sports.
O le tulai mai o lea tulaga na fesiligia ai e le toatele pe aisea ua toe foi ai i Samoa le alo o le atunuu. Sa tau agai mafaufau o tagata pe ua iai se faaletonu i fesootaiga o le konekarate fua ina tulai mai lea tulaga.
Na iu ai lava ina faaalia se finagalo o le tuaa o Mikaele Pesamino i luga o lipoti a nisi o nusipepa i Samoa, ma ia faaalia ai lona faanoanoa i le lē lelei ona tapena le konekarate.
Peitai ua faailoa mai e le susuga Lauaki Fereti Tuilagi le mafuaaga o le faaletonu, ona ua lē manuia le talosaga na ave mo se visa e mafai ai ona ulufale Pesamino i Peretania.
Na pau lea o le faamatalaga ua faalauaitele, ae e lē o ta‘ua pe aisea ua lē manuia ai le talosaga.
Ua faailoa ai ma se agaga faanoanoa o Lauaki ona o lea taunuuga, peitai sa saunia vaega uma mo le faamoemoe o Pesamino.
E ui ina aliali mai lea tulaga ae ua manatu le toatele o le tapuaiga a Samoa o se tulaga lelei le toe filifilia o lea alo o le atunuu auā le sauni atu o le taitoafitu a le Manu Samoa i taaloga a Malo o le Taupulega, auā e lē o faatamala atunuu lelei i le lakapi iuni e pei o Niu Sila, Ausetalia, i le fia maua o le pine auro i ia taaloga.
O le agaga fiafia foi lea o le pulega o le ‘au a le atunuu aemaise tama o le au taitoafitu ona ua toe vaaia Pesamino i totonu o tapenaga auā lea faamoemoe i taaloga faavaomalo.
