(Taaloga Pulega Purisipeni Sisifo)
Soo se faamoemoe lava, e tatau ona iai se iuga e ao ona tulimatai i ai. Ua lua masina talu ona mae‘a taaloga tuufaatasi a le Pulega a Purisipeni i Sisifo, peitai sa tulimatai i se aso e faia ai a latou tufagaipu o lenei foi tausaga.
O le ta o le 9 i le taeao o le Aso Toonai talu ai, aso 13 o Novema, sa tauaofia ai le pulega mo lea faamoemoe.
Na amataina i se lotu o le potopotoga sa taitaia e le susuga i le faafeagaiga ia Rev Makisua Reupena, lea o loo galulue ma le faletua ia Nima i le Ekalesia EFKS i Centenary o le teutupe foi lea a le Pulega.
E 4 ekalesia ae lima i le ekalesia o loo tausia e le susuga i le Toeaina Faatonu ia Rev Kerita Reupena & faletua ia Binary o le matagaluega a Kuiniselani.
O lea potopotoga sa nafa ma le iloiloga o le itu faaleagaga o aulotu taitasi i totonu o le Pulega.
O taaloga sa feagai ai i le masina o Setema e aofia ai le kirikiti, voli polo, lakapi pa‘i ma nisi taaloga sa faia ai le tufagaipu i le Aso Toonai. E ese mai lea i taaloga a le Matagaluega EFKS sa faia i le aso 6 o Novema.
O le aotelega la o ekalesia e 5 e tusa ai ma taaloga, na tulai mai ai le ekalesia a West Side i le tulaga muamua, ma o le ekalesia lea o loo tausia e le aao tusitusi o le pulega, le susuga ia Rev Lance ma le faletua ia Lite Tautiepa. Ua savalia nei le 4 o tausaga o tumau pea le talita a le Pulega i lea ekalesia.
O le Aso Sa i sauniga masani sa toe tuufaatasi ai ekalesia e 5 a le Pulega ona o le faigame poo faigataulaga masani i le masina o Novema. O lea sauniga sa lauga faamavae ai le faafeagaiga na malaga mai Samoa, le susuga ia Rev Ionatana Tupolo lea o loo galulue i le ekalesia EFKS i Vaipu‘a i Savaii.
Sa fai malologa mai o ia ma le faletua i Brisbane, ma o se faamanuiaga foi lea i le Pulega lo la asiasi mai. O loo faamautu i le susuga i le faafeagaiga ia Rev Milo ma le faletua ia Talamasinei.
Sa maua foi sona sao na te taitaia ai se sauniga i luga o le Penina o Asuisui 1197am. O le isi faafeagaiga o le Pulega a Purisipeni i Sisifo, le susuga ia Rev Aofaiga Levi ma le faletua.
