Toe molimanao le Don Bosco ia Vaimasenuu Zita Martel

Ua tolu nei tausaga talu ona sola mai le fautasi o le Segavao Digicel ma le siamupini o tuuga fautasi o aso faailogaina o le Fu‘a a Tutuila lea na manumalo ai i le tausaga e 2006, ae ua toe aumai le valaaulia e malaga atu le Segavao o loo taualo e tama aoga o le Don Bosco.
Na mafua ona le toe foi le fautasi e puipui le siamupini i le tausaga e 2007 ona sa fetaui tonu ma suega a le fanau, ma ua le lava foi le tulaga tau tupe.
O tuuga fautasi o le Sisigafu‘a i le masina o Iuni o le tausaga ua mavae sa kapeteniina ai le Segavao e se alii, ona ua le avanoa le tamaitai sa uluai avea ma kapeteni, le Afioga Vaimasenuu Zita Martel.
Peitai o le sauni malaga atu o le fautasi mo aso o le Fu‘a a Tutuila i le masina o Aperila ua toe manaomia ai le Afioga Vaimasenuu Zita e pei ona faamaonia mai e le alii pule o le Don Bosco le afioga Patele Petelo Vito Pa‘u.
“Ioe o le Afioga Vaimasenuu o le a toe kapeteniina le fautasi ma tapena le malosi o le auvaa”, na saunoa mai ai le alii pule.
O le valaaulia o le Don Bosco ua faamatalaina o se auala ua faaui mai ai se lu‘i mai kapeteni o fautasi a Tutuila ma Manu‘a sei toe alu atu e saili poo tumau lava lona malosi, ma le tomai o le tamaitai o Vaimasenuu Zita Martel.
O ia le uluai tamaitai ua kapeteniina se fautasi i Samoa Tutoatasi ma Amerika Samoa, ma atonu o se isi lea mafuaga o le fia osi pea o le toilalo o alii kapeteni o fautasi i le teritori.
Na faateia uma auvaa o fautasi na tausinio ma le Segavao i le tausaga e 2006 ina ua sosolo ane le Sa mai Samoa Tutoatasi ma fisi uma i tua ae faasasao i le tini.
Ua faaalia e le alii pule o le Don Bosco o le a le alo tamala le kapeteni ma le auvaa ia latou sauniuniga ona e le faigofie fautasi o Tutuila aemaise nisi o Sa fou e pei o le fautasi o le aoga maualuga a Samoana, lea sa fausia e le susuga Maselino Ioane o le tufuga foi lea na fausia le Segavao ma nisi o fautasi e pei o le Littlerina.
O le foufou atu o le auvaa ma le ausiva a le Don Bosco o se valaaulia ua matua faafiafiaina ai le alii pule o le aoga, ona o se avanoa lelei e toe faaiila ai le taleni a tama aoga e le gata o faafiafiaga faa-Samoa, ae o faafiafiaga i le gataifale.
E tusia lenei lipoti e lei maua se avanoa i le tamaita kapeteni le Afioga Vaimasenuu Zita ona o loo malaga i atunuu i fafo i tiute faalegaluega.
O le a taumafai e maua i ai se avanoa pe a toe taliu mai i le atunuu sei aumai sona finagalo i le avanoa ua toe maua na te kapeteniina ai le Segavao i tuuga fautasi o le Fu‘a a Amerika Samoa o lenei tausaga 2010.
O le faailipu a le Malu o le Malo poo leoleo o loo valaaulia foi e le komiti o tapenaga o le Fu‘a a Tutuila.