Momoo se alii kuka lauiloa a Niu Sila i taumafa Samoa, aemaise o ana tu ma aganuu ma faafiafiaga
E fa vaiaso o loo talia ai le tuufaatasia o se ata sa pueina e se tasi o fale televise a Niu Sila.
O le mae‘a ai o galuega mulimuli ma lona tuufaatasia e pei ona galulue i ai le aupueata ma le faatonu o lea foi polokalame, o le a faalauiloa mai ai le aso ma le taimi tonu o le a faaalia ai ma maimoaina e tagata lautele o Niu Sila, lea ata i luga o le televise.
O le alii kuka lauiloa a Niu Sila, Simon Gault sa muai vaai i le manaoga autu o lea ata.
O le faaipoipoga faa-Samoa moni, o se vaega taua o loo autū ma taulai i ai se isi vaega o le ata. I le vaaiga faapitoa mo Samoa lava ia, e tolu ona vaega sa vaevaeina i ai lona pueina.
O ia veaga e tolu ua vaevaeina ina ia maua ai le sini atoa ma le autu sa tulituliloa e le alii pule o lea polokalame. Sa amata pueina mai i totonu o le atunuu, ae faamae‘a i Niu Sila. Sa malaga faapitoa lava le alii faatonu ma lana aupueata i Samoa mo le amata pueina o le vaega muamua. O isi vaega e lua sa pueina lava i totonu o Niu Sila.
Vaega muamua
Sa taulai ma fia maua se vaaiga lautele i totonu lava o le atunuu. O tu ma aganuu faatino, sa manaomia ai se vaaiga i le taimi o taupulega a aiga na lua mo le faaipoipoga e pei ona autu i ai le ata.
O talanoaga, ma tapenaga a aiga Samoa mo le saunia i le faatinoina o se faaipoipoga faa-Samoa moni. E ui ina ua seasea lava ona toe vaaia le faatinoina o le faaipoipoga Samoa lava ia (traditional wedding), peitai sa manaomia pea se vaega ma sona faatinoga e pei ona manaomia.
Vaega lua
Sa fia maua se vaaiga i le taimi o le gasesega o taumafa Samoa moni. E faapefea ona faatino mai lava i le umukuka seia oo lava ina sauni e faaaoga. E aofia ai le faavaiina o puaa, povi poo mamoe, suavai talo, ma isi mea aano, o moa ma ia, ma isi, aemaise nisi o kuka e fiafia i ai le atunuu i aso faapea.
O soo se taumafa Samoa lava e mafai ona gaseseina sa autu i ai lea foi vaega o le ata. E le gata i lea, a o i latou foi e faatinoina le kukaina ma le faavelaina o taumafa sa faatauaina foi.
Vaega tolu
O le taimi o le sauniga ma le agai o le alii ma le tamaitai faaipoipo e talia le Sakarameta o le faaipoipoga i sauniga i totonu o le malumalu. O laei faaipoipo, laei faa-Samoa, o tu ma ni aga faapitoa o taimi faapea. O le auvalaaulia i le taimi o le sauniga ma le taimi o le taumafataga. O se vaaiga i le tapenaina o le fale tele mo le taumafataga, o gaioiga a le aukuka i le faasoasoaina o taumafa. I le ma le tulituliloaina o siva, ma pese ma faafiafiaga eseese faa-Samoa moni i aso faapea.
O vaaiga sa pueina i Niu Sila, sa taulai lea i le kamupani sa nafa ma le saunia o taumafa, e le gata i le faavelaina ae faapea foi lona faasoasoaina i le taimi o le taumafataga tele.
O le kamupani a le Continental Catering i Otahuhu i Aukilani i Saute, le faletua ia Lena Brunt ma lana aufaigaluega sa faatinoina le gaseseina o taumafa, ma o le isi vaaiga lea o le a maimoaina.
O le taimi o le sauniga ona talu ai o le faaipoipoga sa faia i Niu Sila. O se vaaiga i le malumalu ma le sauniga, atoa ai ma isi vaaiga mulimuli ane ai, e pei o le taimi o le hall i le taumafataga, ma faafiafiaga.
O ai le alii ma le tamaitai faaipoipo
O Alberts Omlang ma Emma Rhian Sione o i laua ia ua avea ma vaaiga autu i le ata, ma lo la aso fiafia. O le alii faaipoipo o Alberts Omlang e mai le atunuu o Filipaina, ae o le tamaitai o Emma e mai le afioaga o Salelesi i Upolu ma Safune i le motu tele i Savaii.
O le Ekalesia Aso Fitu o le Toe Afio Mai i Henderson na faia ai le sauniga o le tuufaatasia o le ulugalii fou, ae o le hall a le Kelston Community Centre, na faataunuuina ai le taumafataga.
O le Aso Faraile aso 16 o le masina nei lava sa faataunuuina ai le faaipoipoga ma sa faauauau ai ona pueina vaega na totoe mo le tuufaatasia o le ata.
O le aso 15 o le masina nei lava, sa pueina ai le isi vaaiga a o feagai le Continental Catering i Otahuhu ma ana tapenaga mo le taumafataga.
O ai faatonu ma polokalame o le televise?
O le ata ma lona tuufaatasiaina, o loo faauluulu i le alii kuka lauiloa i le tele o polokalame faapea i Niu Sila ma le lalolagi atoa aemaise lava le atu Europa.
O le alii o Simon Gault o se tagata faaaloalogia tele, ma e lauiloa i lana taleni kuka i polokalame a le TV, le MasterChef.
O se feiloaiga ma le tamaitai sa tuufaatasia suesuega ma le tulaga tau fesootaiga ma le faalauiloaina o lea foi ata, le tamaitai o Julie Roberts, sa ia faailoa ai ona pau lea o le tulaga e lei mautu mo le taimi nei.
O le mae‘a ai o tapenaga ma le pueina o le ata e pei ona faagasolo ma tuufaatasi, ona faamautinoa loa lea o se igoa e fetaui lelei ma le taumafaiga.
Sa ia ta‘ua foi e faapea o loo iai lava igoa ua mae‘a ona fuafuaina, peitai e lei faia i ai se faaiuga mautu mo le taimi nei, ma o le gaioiga mulimuli lava lea o le a agai i ai le alii pule ma le vaega pueata, pe a mae‘a vaega uma o loo tau tuufaatasia.
O se tasi o itu lelei sa ia ta‘ua, o le fiafia tele ma le faafetai o le alii pule o Simon Gault, ona o lona filifilia o Samoa ma ana taumafa, aemaise o tu ma aganuu, o se vaega e taulai i ai le ata faasolo.
Sa ia ta‘ua o agavaa ma tomai o le alii o Simon, sa fesoasoani tele mo le faia o lana filifiliga ua faatāua ai Samoa. O se tulaga e lei tupu muamua, ma e talitonu le alii pule, o le a telē se aogā mo Samoa lava ia, aemaise o nisi o pisinisi a tamafanau a le atunuu o le a aafia i vaega faatulagaina o le ata.
O le a faalauiloaina foi e le Samoa Times ma le Radio Samoa taualumaga uma o loo galulue ai le pulega a le televise i le taimi nei seia oo lava ina faamautinoa mai le aso ma le taimi, o le a faaalia ai i luga o le televise mo le uluai taimi lea foi ata ua tulitulimatai nei.
