Toe manatua e le tamaitai kuka Samoa aso ua tuanai

O le tamaitai o Monica Galleti lea ua faailoa lona ata ma talaaga i nisi o tusitusiga i le vaiaso nei i nusipepa ma mekasini, o se tamaitai sa ola ane i Samoa ma ua maea ona faalauiloa aloaia lana tusi ua faaigoaina o le Monica’s Kitchen.

O lea tusi o se taumafaiga a le tamaitai o Monica e faailoa ai foi ana metotia ma auala e mafai ai ona laulauina ni taumafa lelei ona gaseseina i totonu o maota ma laoa.

Pei ona taua i se faamatalaga a le tamaitai o Monica i le The Telegraph, o ia na soifua ane lava i Samoa ma ona tuagane e toafa ma lona uso e toatasi ma o loo ia manatua lelei le soifuaga masani i Samoa aemaise lava i aso Sa e fai ai le suavai e taulelea poo le itupa o alii i aiga ma kukaina ai taumafa e pei o moeituaolo, moa poo se ia foi mai le moana fai faatasi ai ma ni meaai aano mo le taliga o le sua i se taimi e tuua ai sauniga lotu.

Manatua e le tamaitai kuka o Monica le taua o lea soifuaga i aso ao itiiti ma o i sa fiafia mai ai lava e iai i le umukuka poo le tunoa foi faatasi ai ma lona tina ma nisi o lo latou aiga ao gaseseina taumafa.

O se tasi lea o vaega taua o loo faaaogaina pea i ana kuka i le vaitau lenei e pei ona faamanino i lana tusi ua faalauiloa ma o loo fatauaina ai foi nisi o ituaiga gasese ga taumafa e pei ona faatinoina ai i Niu Sila nei.

O lana tusi la ua faalauiloa sa lomia e le Quadrille ma e faigofie foi ona maua iai le tele o ni lesipi lelei mo le kukaina o taumafa toe faigofie ma o loo vaevaeina foi i vaega eseese e talafeagai mo taumafataga.

Ua taua e lea tamaitai Samoa o se taimi o le tausaga nei e malaga ai i lo tatou atunuu faatasi ma si ona toalua o se alii Farani ma lana tama teine e feiloai ma asia foi si ona tuagane matua o loo nofo mai pea i le aiga i Samoa ma o loo fia faailoa ai e Monica i si ona toalua le matagofie o taumafa mai si o tatou foi atunuu.