Ua molimauina le faasolo ina toe masuiga mālie ma maua le filemu i le vevesi na tulai mai i le vaiaso ua mavae i le va o nisi o tupulaga talavou o Vaigaga ma Vaiusu lea na pūpū ma taei ai tioata o le faapaologa o le Malumalu o le EFKS a Vaigaga i le po o le Aso Lulu ua mavae.
O le po o le Aso Tofi na sosoo ai na toe alu ai se isi osofaiga a nisi o tupulaga o Vaiusu e pei ona faamatala e le alii o Junior Tomasi, o le latou fale na matuā faaleagaina i le osofaiga lea ina ua tauai maa e tupulaga o Vaiusu.
Na faaleaga ai a latou meatotino e pei o meafale aemaise le taavale a le faifeau EFKS e tausi ma fealuai ai le alii o Junior.
O lana faamatalaga na taei uma tioata ma le tino o le pikiapu a si faifeau na sasa ai maa ma omoomo ai.
O le tuanai o ia vevesi na fono ai loa le ekalesia EFKS ma leoleo e saili se fofo o le vevesi. Na fono foi matai o faiganuu a Vaigaga ma Vaiusu ma tasi ai e toe faamamalu le vavao poo le Sa a Vaigaga lea na amatalia i le afiafi o le Aso Faraile 31 o Aukuso 2012.
O Vaiusu o loo tausia pea lana vavao peitai o le vevesi na tupu ua mafua ai ona toe faamamalu le vavao a Vaigaga i le lagona o matai ma le ekalesia o se faiga lelei e toe tausia ai le filemu ma maua ai foi le avanoa o tupulaga e agai sa‘o ai i fale mo lotu o le afiafi ma isi fuafuaga masani.
O le vevesi na tupu e lē o iloa tonu lava le mafuaaga ae o nai faamatalaga ua maua e faapea o se alii talvou o le nuu o Vaiusu na faaoolima i ai se tupulaga o Vaigaga le mafuaaga. E tuanai le vevesi muamua i le po o le Aso Lulu taei ma pūpū ai tioata o le faapaologa o le malumalu, ae poo le Aso Tofi a malaga le Aso Faraile na tea nei, ae alu le solo tele a nisi tupulaga o Vaiusu ua tauai fale e 4 o nisi o aiga o Vaiusu ma Elise e pei ona faaalia e se molimau. O faamalama na faaleagaina o fale, o meafale ma isi meatotino aogā e pei ona molimau mai Junior i le tusitala.
O le faamatalaga foi a le faletua o le faafeagaiga EFKS a Vaigaga o Naomi na ia ta‘ua ai le lē mautonu o le toatele o le aulotu pe aisea lava ua matuia ai faapea lea gaioiga. E leai se tala tele a le faletua na o lona misi alofa i nai aiga ua afaina meatotino i le gaioiga.
O le la taavale e fealuai ai se taulealea o le aulotu lea na faaleagaina ai i le tauaiga maa i le po o le Aso T ofi. Ua i lima o leoleo le vevesi ma ua ta‘ua e se molimau e feololo lava le numera o tupulaga o nuu e lua ua taofia nei mo suesuega.
