O le mae‘a ai o le faaiuga a le Faamasinoga ua faaleaogāina ai ni tagi faasaga i se alii Leoleo i Apia, ua toe tāpā ai e le tamaitai na tagi i lea mataupu se fesoasoani a le tulafono ona o lona manatu, sa tatau lava ona aafia lenei alii na ia tuuaia i le faia o ni sauāga ia te ia.
O le tamaitai lenei o loo puipuia lona suafa e le Faamasinoga, ua ia ta‘ua le matuā ofo i le mae‘a ai o iloiloga faasaga ia Faaee Te‘o o se alii Leoleo ua leai ma se moliaga e aafia ai. Na tuuaia e lenei tamaitai Te‘o i le toso teine ma le faaoolima.
O le faamasinoga o le toso teine na faaleaogāina e le vasega o Faatonu na fofogaina le mataupu, ona o le lē lava o mau a le itu tagi e faamaonia ai lea moliaga.
O le tagi lona lua a lea tamaitai o le faaoolima ma na ioe lea alii i le moliaga.
Taito Josephine Mamaia o le tamaitai pule o le Colonial ma le tina ia Iulia Faatau ma le fanau i le faamanuiaga mai i le tama O le faaiuga a le Faamasinoga i lenei mataupu na ta‘ua ai, o le molimau a le alii leoleo e faatolu lava ona faatu lana taavale ae tuli i fafo lea tamaitai peitai e lei alu i fafo ma na ia ta‘ua i le Faamasinoga, na ia tulilima le tamaitai ma na ia ta‘ua muamua foi e faalua ona ia po le gutu o lea tamaitai.
O ata na faaalia i le faamasinoga na molimauina ai manu‘a i foliga o lea tamaitai ma lona ua.
O le faaiuga a le Faamasinoga na ta‘ua ai sa taumafai lenei alii leoleo e tuli ese le tamaitai, ma o le tamaitai foi na manao lava ia e alu i le taavale a lē na molia e aunoa ma se tauanauina.
O le molimau a le tamaitai na ia ta‘ua ai, na fesili atu lea alii pe mananao i se auala e momoli ai i le fale na mafua ai ona o ma lana uo tamaitai i le taavale.
O loo ia teena foi le na o le lua o po ma le tulilima o ia ona o lana faamatalaga na taumafai lea alii e titina o ia.
Na ta‘ua e lenei tamaitai o le vaega muamua o ana talosaga i le tosoteine ua ia iloa lava o lona alu sa‘o i le fale ma faamalu ua lē alu sa‘o i le falemai ua aveese uma ai mau sa tatau ona faaaogā i lea tagi.
Ae o loo ia tuuaia leoleo i lea tulaga ona o lana faamatalaga, e leai ma se fai atu o leoleo e agai sa‘o i le Falemai mo suesuega ae o lona ita tele, ua matuā faateia i le tulai mai o lea faalavelave na alu ai lava i le fale taele, ua moe ma na faato‘ā alu i le aso e sosoo ai.
O le faamatalaga a lenei tamaitai ana fai atu se isi i lea po, ma ana o foi ma se leoleo e pei ona iai aiaiga o tagi faapenei ma le aoina o faamaumauga, e lē mafai lava ona alu i le fale ae faasasa‘o loa i le falemai.
O le vaega lona lua la o le faaoolima na ia ta‘ua ai, sa faapea lava e aafia ai lenei alii ona o lea ua ioe i ai.
Na fesiligia e le Samoa Times le alii Komesina Lagolago o le Ofisa o Leoleo o Leaupepe Fatu Pula i le faaseā a lenei tamaitai, ma ia ta‘ua atonu ua faatamala foi i latou na tau atu i ai le tagi a le tamaitai ae o faiga faavae lava ia a Leoleo, soo se tasi e tagi i le tosoteine e o lava ma le leoleo i le Falemai ina ia faatino suesuega a le falemai ma maua mai ai mau o suesuega o ia tagi faapea.
O le tulaga e pei ona iai le toe foi atu o lenei alii i le galuega faaleoleo na ta‘ua e Leaupepe o le faaiuga lava la lena a le Komesina o Leoleo ma le Pulega o le Matagaluega.
O le tamaitai ua aafia ua ia faaalia le faanoanoa ae o loo i Niu Sila i le taimi lenei auā feiloaiga ma fomai o le mafaufau ina ia taumafai ai e faafoi se filemu i lona loto talu ai le mataupu ua tulai mai.
“Ana ou iloa lava o le tulaga lea e toso ai le mataupu ma ua atili faamatagā atu ai ma a‘u ae leai se fesoasoani e maua mai ai, ou te nofonofo lelei lava e lē faia i ai se faiga i lenei mataupu,” o sana faamatalaga lea.
