Toe laga e Taelefaga le manogi leaga

Ua silia ma le tausaga talu ona amata faalauiloa lenei mataupu ma ua atoa nei foi le tausaga o faatali lava se galuega e mafai ona faatino e le Faalapotopotoga o Malosiaga tau Eletise le EPC i faitioga a le afioaga o Taelefaga i le atu Fagaloa.

O le faitioga, o le lē mafai e tagata ona tatali le manogi leaga lea e sau i le vai o loo to‘a i le ogatotonu o le nuu.

O le vai lenei o loo tafe mai i le afi eletise i lea afioaga. E le o mafai ona tafe sa‘o i le sami lenei vai ona e fai lava ma to‘a ma ua faaputuputu lava ma agai mai ai loa le manogi lega lenei.

Faaalia e sui o le afioaga, na iu lava ina agai i le Soifua Maloloina e fesiligia pe lē o le manogi malosi lenei ua mafua ai ona gasegase nisi o le nuu.

Na fai ni suesuega ae faapea mai ai le Matagaluega o le Soifua Maloloina, e le o le mafuaaga lea o gasegase ae e tatau lava ona faamamā lea nofoaga.

Na faatusa e le Matagaluega o le Soifua Maloloina le manogi lenei, i le manogi o le pala i Saleimoa lea e fai lava ma lagona e lea foi itu o le Tuamasaga. Faaalia e le soifua maloloina e malosi le manogi ae e le o le mafuaaga lea o nisi o gasegase ia na tuuaia ai e le afioaga.

E ui o lea na ave lava fautuaga a le Matagaluega i le Faalapotopotoga poo le Malosiaga tau Eletise ina ia o latou fai se faiga e faamamā ai lea nofoaga.

Ua taatia foi se lipoti a le Matagaluega o Punaoa faale-Natura ma le Siosiomaga e faatatau ia latou suesuega i lea lava vai lafoai.

O le popolega o alii ma faipule o Taelefaga, ona o lea ua vaaia le faatamaia o nisi o vaega o le sami o lea afioaga ma e manatu le nuu e mafua uma mai i le vai lafoai lenei.

O le vai o loo agai mai i atumauga o le atu Fagaloa ma agai tonu i le gaosiga o le eletise i le afi lenei ma o le vai lafoai la lea ua faapea ona tulai mai ai faaletonu ma faitioga.

O le vaiaso na tea nei na toe agai ai foi le afioaga lenei i le Faalapotopotoga o le Malosiaga tau eletise ma na iu ai i se asiasiga a le Alii Minisita a le EPC le afioga Manu‘alesagalala Enokati Posala.

O lea feiloaiga na folafola ai e le Minisita o le EPC o le a agai vave mai le aufaigaluega ina ia faia se faiga e mautinoa ai le tafe ese o le vai lenei ua to‘a i totonu o le nuu ma ua fautuaina foi le afioaga afai e tetele le manogi leaga e mafai lava i le afioaga ona o latou tape le afi, seia fai ifo foi le vaitoa lenei ma alu ese le manogi.

O le faafitauli o lea faiga e tape loa le afi leai se eletise e toe maua e lea itu uma o le atu Fagaloa. E lei faia lava la lea faatonuga e le afioaga e pei ona saunoa i ai le afioga Fuiava Gago o le pulenuu o Taelefaga.

Ona pau le tulaga na ta‘ua e lea taitai o le afioaga, o le faatalitali poo le a la se vave e mafai ona oo i ai le folafolaga a le alii Minisita o lea o le a agai atu ai le aufaigaluega a le EPC e fufulu ma faamamā lea nofoaga.