O se tofi faasolo mai o latou tuaa ua tofafā mai tiasā, sa naunau suli uma o Sa Tofae mai le afioaga o Falevao, ina ia toe taliu ai i fanua ma laueleele e faataunuu ma sapapaia lenei tofi tuufaasolo, o measina a lo latou aiga.
O le Aso Tofi o le vaiaso ua mavae, na potopoto ai tulatoa ma matai o le aiga “Siitaga Fita” mai Falevao faapea le aiga o le “Aai o Fonoti o le Fatu Faasolo o le aai o le Tupu” mai Falefa ma faaee aloaia atu suafa matai fou a le aiga Sa Tofae mai le afioaga lava o Falevao.
Na aofia ai ia i latou na faaee i ai nei suafa tāua o le aiga, le afioga i le alii faipule o Magele, le tofa ia Su‘a William Sio, lea ua faaee aloaia atu nei i ai le suafa matai tāua o le Tofae o le aiga Sa Tofae, ua avea ai o ia o le matai o le Sa‘o o le Aiga Sa Tofae.
O Tofa Su‘a William Sio o le tamafanau moni a le afioaga o Falevao e tauala mai i lona tuaa ia Alatasi mai Satapuala, ae o loo ia umia foi le suafa matai Su‘a mai le aiga Letaupe i le afioaga o Matatufu i Lotofaga i Aleipata.
I lea lava sauniga faapitoa, sa faapea ona auai atu ai ma le tamaitai ia Lydia Sosene o ia o le taitaifono a le Pulega a Aukilani mo le Komiti Fafoe faa-Itumalo a Magele ma Otahuhu, ma na faaee atu ai ia te ia le suafa matai LeMauga faapea le tamaitai faufautua mai le matagaluega o le soifua maloloina i le Pasefika ia Hilda Nuualiitia Faasalele na faaee atu i ai le suafa matai o le Matafanua.
O le tausaga 1995 na taufai malilie ai le aiga Sa Tofae e faataunuu le manaoga a tuaa matutua, o le a tofu uma faletama e 10 na tupuga mai ia Tofae Faafetaiaso ma Suai ma se sui e toatasi mai faletama taitasi e faamatai i le aiga, e aofia ai ma nisi o le auaiga ua alala i Tonga ma Fiti.
O le alii ia Loloma Patrick Afeaki ma lona tuafafine ia Anikita Afeaki Coe mai Aukilani o nisi foi o suli o le aiga Sa Tofae o loo tala gafa i Toga sa faapea ona faaee atu i ai le suafa matai Tofae ma Polai‘a. Sa auai atu ai foi le susuga i le faafeagaiga mai Aukilani ia Amelia Nuualiitia i lea foi sauniga tāua ma faasuafaina ai i le saufa Lepua.
I le aso 25 o Tesema 1995 na faatuina ai se maa faamanatu i Falevao auā le faamanatuina o se maliliega na autasi i ai suli e toaiva o le aiga Tofae Faafetaiaso ma Suai o loo faapea ona alala ma papaaao i Niu Sila, Toga, Fiti, Samoa ma Amerika.
Sa auai atu foi nisi o sui o le komuniti a Magele, ia Sally Ikinofo ma Makalita Kolo sui o le Labour Party i Magele, faapea le susuga i le faafeagaiga ia Rev Marie ma Apisaloma mai le Auckland Church Ministers faatasi ai ma auaiga mai atunuu i fafo ma Samoa e molimauina lea faamoemoe tāua o le auaiga o Sa Tofae.
