O le vaaiga lena i le taligalu i tua tonu o le maota o le malo

O le vaaiga lena i le taligalu i tua tonu o le maota o le malo

“Pei lava na faasino mai a’u e si o’u toalua ou te toe alu e vaai le mea na maua ai lona tino.” Na ou foi mai loa i le ofisa o leoleo i le aoauli o le Aso Sa, ae malosi lava lo’u lagona, ou te toe alu i le taligalu i tua o le fale o le malo lea na maua ai si o’u toalua.” O le vevela o le aoauli o le Aso Sa, ae na pupue a’e lava lo’u manao ou te alu loa i le taimi lava lea i le taligalu. Sa ou vaaia ai loa iina se alii faafafine o nofonofo ai, ma ou alu atu sa’o lava iai ma talanoa, ae talanoa mai le tagata lea, ua uma ona ave ia e leoleo e fesiligia i le mea na tupu. Ae o le taimi na ave ai le faafafine e leoleo, e lē o telē sona iloa i le mea na tupu.”

“Ae sa foi ane ma talanoa ai loa i tagata e masani ona latou  feofeoai ma fai le taligalu ma o latou nofoaga e fetaui iai, ua iloa ai nei e le faafafine le tele o faamatalaga lea ua ta’u uma ane ia te ia.”

“Ma ua ta’u mai ai nei e le faafafine lea, igoa ma foliga o tagata lea na latou faia le faaoogalima i lo’u toalua. O tamaiti o loo aafia, i le molimau lē aloaia lenei a le faafafine, o ni tamaiti lava e feoai i le taulaga ma faia le amio o le faamata’u o tagata, ae fao meatotino.”

  “Ou te lei toe foi i leoleo ma faamatalaga fou nei ua maua, seia aulia le Aso Gafua lea ua uma ona fai le matou tala ou te toe alu atu ai. O le faafafine foi lea na ma talanoa i le taligalu i le aoauli o le Aso Sa, na ia ta’u mai ai te au, o le telefoni a lo’u toalua, na faatau e tamaiti faaolima ia i le tagata e aoina lapisi i le taulaga. E tele lava se sao o le faafafine lea i la’u sailiga o faia nei, e ui ina e leai se faamaoniga aloaia o ia molimau, ae ua avea lava o se faamāmā avega, ia te au.”

E ui ina e lē mafai e na molimau ona soosoo pe fonofono ai ta’eta’ei ma pu pu o le fatu o lenei afafine loto mafatia. Ua toe manatua ai lava e le Tusitala le faatalatalanoaga faasamasamanoa ma Shine, i le fitu aso talu ai, a’o mafanafana pea le la mafutaga, ma fuafuaga alualu mamao o le la aiga.

O le aso foi lena faato’a uma ona faatau a la fualaau’aina i le maketi i le taeao o le Aso Sa, sa o uma lava e faatau la fualaau. “O tupe lava e maua mai i ma fualaau, e fai ai mea ou te manao ai ma fesoasoani i lo’u aiga. Ae ua manao lava si o’u toalua e fai se ma pisinisi pe a manuia lava ma mea ia e fai, ma lana talosaga ia toe talia, e toe faaumiumi ai lana nofo iinei.”

“Ua iai foi le fuafuaga ma te faaipoipo, ma fai lava ma’ua mea e pei o se ma faleoloa e faatau ai soo se mea lava, ma fesoasoani ai i o ma aiga. O le taimi nei, e ma te nonofo i le falemautotogi, o loo totogi e le malo o Saina, ae e fai lava ma mea totō i le matou aiga i Saanapu. O fualaau’aina e tupe lelei tele, ma ou te toaga lava e fai, ua masani ai lava foi ta’ita i le fai o galuega suetupe faapea, ma faapena ona fiafia ai lava si o’u toalua ma te o e ave ma fualaau i le maketi i Aso Sa.”

Ua atili tiga ai lagona o le afafine lenei ma tagitagi ai i le Aso Sa atoa, ona ua leai se la faatauga fualaau o lenei Aso Sa, talu le tagatavaleina faafuaseia o lana manamea sa faamemelo ma mafanafana ai, aemaise pe a manatu ia la fuafuaga alualu mamao sa folasia i taimi o la feofeoa’iga. “E lē o se tagata e talanoa solo i ni tagata e lē masani ai, e ui ina lelei lana tautala i le gagana peretania, ae filemu lava ia. E fiafia lava e faitau tusi, ma alu e savalivali i vaega o le taulaga ua ia iloa e toatele ai tagata. Ua uma lava ona ou ta’u iai vaega o le taulaga e lē tatau ona alu iai, ma sa faapena lava ona ia nofouta iai. Ae o le taligalu lea na maua ai lona tino maliu, e leai so’u talitonuga, na alu iai na’o ia. Ae ou te faafetai foi i le agaga ma le lagona na toe ta’ita’iina lava a’u i le taligalu i le aoauli o le Aso Sa, ua tele ai isi molimau e maua mai i le faafafine lea na te iloa le kegi ua masalomia ai nei i le tagatavaleina o lo’u toalua.”